ٹنڈوجام/مٹیاری/بدین/محراب پور:پیپلزپارٹی کے رہنما اورسندھ کے سینئر وزیر شرجیل انعام میمن نے کہا ہے کینالز کا مسئلہ سندھ کے لئے جینے مرنے کا منصوبہ ہے، پیپلزپارٹی کسی صورت اس معاملے پر سمجھوتہ نہیں کرے گی۔
پیپلزپارٹی کے رہنما اور سندھ کے سینئر وزیر شرجیل انعام میمن نے ٹنڈوجام میں پیپلزپارٹی کے کینال منصوبے کے خلاف جلسے سے خطاب کرتے ہوئے کہا کہ پینے کا پانی چھین کر سندھ کی سات کروڑ زندگیاں خطرے میں ڈال دی گئی ہیں،انہوں نے کہا کہ 18 اپریل کو پیپلز پارٹی حیدرآباد میں تاریخی جلسہ کرے گی جو کینالز کے خلاف ریفرنڈم ہوگا، بلاول بھٹو جلسے سے خطاب کریں گے۔
انہوں نے کہا کہ جیالوں کے نعرے اسلام آباد تک پہنچاناچاہتا ہوں اور چاہتاہوں کہ اسلام آباد میں بیٹھے افرادجیالوں کی آوازسنیں۔انہوں نے کہا کہ کینالوں کا مسئلہ سندھ کے کروڑوں انسانوں کامسئلہ ہے، ہم سے پینے کا پانی چھین کر7 کروڑ انسانوں کومارنا چاہتے ہیں۔
انہوں نے مزید کہا کہ پیپلزپارٹی کوہرالیکشن میں پہلے سے زیادہ نشستیں ملتی ہیں، سندھ کے عوام پیپلزپارٹی پراعتماد کرتے ہیں۔سندھ کے سینئر وزیر شرجیل میمن نے مزید کہا کہ کالاباغ ڈیم کے حق میں ریلی نکالنے والے آج سیاست کررہے ہیں، ہم کسی بھی صورت میں کینالوں پرسمجھوتا نہیں کریں گے۔
انہوں نے کہا کہ صدرمملکت کے پاس ایک میٹرسڑک بنانے کا اختیاربھی نہیں، یہ بغض زرداری میں صدرزرداری پرالزامات لگارہے ہیں۔پیپلزپارٹی کی رہنما فریال تالپور نے جلسے سے خطاب کرتے ہوئے کہا کہ یہ آپ کی ہماری زندگیوں کا سوال ہے، سندھ کہیں کربلا نہ بن جائے، یہ کیا سمجھتے ہیں، ہم نے شہیدوں کے جنازے اٹھائے ہیں۔انہوں نے کہا ہم آخری دم تک لڑٰیں گے، نہریں نہیں بننے دیں گے، چولستان کو آباد اور باغ کو اجاڑنا چاہ رہے ہیں، یہ کہاں کی سوچ اور کونسی سیاست ہے۔
مٹیاری میں میڈیا سے گفتگوکرتے ہوئے پیپلزپارٹی سندھ کے صدر نثاراحمدکھوڑو نے کہاکہ ہماری آبا دزمینوں کوپانی نہیں مل رہا تونئی کینال بنانے کی کیا تْک ہے۔انہوں نے کہا کہ چیئرمین بلاول بھٹوزرداری کاموقف ہی پیپلزپارٹی کاموقف ہے،18تاریخ کوحیدرآباد میں بلاول بھٹوزرداری کینال کیخلاف خطاب کریںگے ۔
25 تاریخ کوسکھر اورپھرہرڈویژن میں جلسے کرکے وفاقی حکومت کوبتائیں گے سندھ کی عوام کینالز کے خلاف ہے۔انہوں نے کہا کہ وفاق نے کبھی کالاباغ ڈیم تو کبھی کینالزکی صورت میں سندھ پرحملے کی کوشش کی آج جولوگ سڑکوں پرکینالزکے معاملے پر سراپا احتجاج ہیں وہ کالاباغ ڈیم کے وقت مشرف اورنوازشریف کیساتھ تھے۔
دریں اثناء دریائے سندھ پر متنازعہ کینالز کے خلاف سندھ کے مختلف شہروں میں احتجاجی مظاہرے جاری ہیں، بدین میں متنازع کینال کیخلاف کڈھن شہرمیں شٹرڈاؤن ہڑتال ہوئی، شہریوں نے علی بندر روڈ سے پریس کلب تک احتجاجی ریلی نکالی۔
نوشہروفیروز کے علاقے محراب پور میں غیر آئینی کینالز کے خلاف سیاسی اور سماجی تنظیموں نے شاہی بازار سے پریس کلب تک احتجاجی ریلی نکالی ۔مظاہرین کا کہنا تھا کہ کینال بناکر سندھ کو بنجر بنانا چاہتے ہیں، پانی کی قلت کی وجہ سے پہلے ہی سندھ کے لوگ پیاسے مر رہے ہیں۔
جامشورومیں بھی سچل گراؤنڈ سے ایڈمورپمپ تک ریلی نکال کراحتجاج اورنعرے بازی کی گئی مظاہرین نے وفاقی حکومت سے منصوبے کو فوری روکنے کامطالبہ کیا۔
