راولپنڈی/اسلام آباد:سیکورٹی فورسز نے پاک افغان سرحد سے دہشت گردوں کی پاکستان میں داخلے اور دراندازی کو ناکام بناتے ہوئے جوابی کارروائی میں8دہشت گردہلاک اور4 کوزخمی حالت میں گرفتار کرلیا ۔
پاک فوج کے شعبہ تعلقات عامہ (آئی ایس پی آر)کے مطابق5اور6اپریل کی درمیانی شب اندھیرے کا فائدہ اٹھاتے ہوئے دہشت گردوں کے ایک گروپ نے شمالی وزیرستان کے علاقے حسن خیل سے پاکستان میں داخلے کی کوشش کی۔
سیکورٹی فورسز نے دہشت گردوں کی پیش قدمی کو روکتے ہوئے جوابی کارروائی کی جس کے دوران فائرنگ کے شدید تبادلے اور جھڑپ میں 8 دہشت گرد ہلاک جبکہ چار زخمی ہوئے جنہیں گرفتار کرلیا گیا ۔
آئی ایس پی آر نے کہا کہ پاکستان متعدد بار دہشت گردوں کی دراندازی اور موجودگی کے حوالے سے افغان حکومت کو آگاہ اور مطالبہ کرچکا ہے کہ دہشت گرد گروپس کے خلاف کارروائی عمل میں لائی جائے۔ترجمان پاک فوج نے کہا کہ افغان حکومت سے بارہا مطالبہ کیا کہ وہ بارڈر مینجمنٹ کو یقینی بنائے اور اپنی سرزمین پر موجود پاکستان مخالف دہشت گردوں کے خلاف کارروائی کرے۔
اعلامیے میں کہا گیا ہے کہ علاقے میں دیگر دہشت گردوں کی موجودگی کے پیش نظر آپریشن کلین اپ جاری ہے اور سیکورٹی فورسز وطن عزیز سے دہشت گردی کے خاتمے اور سرحدوں کی حفاظت کیلئے چوکس و پرعزم ہیں۔
دریں اثناء صدر مملکت آصف علی زرداری ،وزیراعظم شہباز شریف اوروفاقی وزیر داخلہ محسن نقوی نے پاک افغان سرحد سے دراندازی کی کوشش ناکام بنانے پر سیکورٹی فورسز کو زبردست الفاظ میں خراج تحسین پیش کیا ہے۔
آصف علی زرداری نے8خوارج دہشت گردوں کو جہنم واصل کرنے پر سیکورٹی فورسز کی بہادری کو سراہا۔صدر مملکت نے مزید کہا کہ پاکستان کی بہادر افواج ملکی سرحدوں کی ہمہ وقت حفاظت کے لئے پرعزم ہیں، دہشت گردی کے عفریت کے مکمل خاتمے تک دہشت گردوں کے خلاف کارروائیاں جاری رہیں گی، قوم دہشت گردی کے خلاف جنگ میں سیکورٹی فورسز کے ساتھ کھڑی ہے۔
وزیراعظم شہبازشریف نے پاک افغان سرحد سے دراندازی کی کوشش ناکام بنانے پر سیکورٹی فورسز کو زبردست الفاظ میں خراج تحسین پیش کیا ہے ۔
وفاقی وزیرداخلہ محسن نقوی نے بھی پاک افغان سرحد سے دراندازی کی کوشش ناکام بنانے پر سیکورٹی فورسز کو زبردست الفاظ میں خراج تحسین پیش کیا ہے۔محسن نقوی نے کہا کہ سیکورٹی فورسز نے ہمیشہ کی طرح آج بھی بر وقت کارروائی کرکے دہشت گردوں کی شمالی وزیرستان میں دراندازی کو ناکام بنایا، پاکستان کی بہادر سیکورٹی فورسز نے دراندازی کرنے والے8خوارجی دہشت گردوں کو عبرتناک انجام تک پہنچایا۔
انہوں نے کہا کہ دہشت گردوں کے ناپاک عزائم خاک میں ملانے پر سیکورٹی فورسز کو سلام پیش کرتے ہیں۔ وزیر داخلہ محسن نقوی نے سیکورٹی فورسز کی پیشہ وارانہ صلاحیتوں کو بھی سراہا۔ انہوں نے کہا کہ قوم دراندازی کرنے والے دہشت گردوں کے خلاف سیکورٹی فورسز کی کارروائی کو تحسین کی نگاہ سے دیکھتی اور ان کی پیشہ وارانہ مہارت و جرات پر فخر کرتی ہے۔
