اسلام آباد/بیجنگ/نیویارک:چین کے وزیرخارجہ وانگ ژی نے وزیر خا رجہ اسحاق ڈار سے ٹیلی فونک گفتگو کرتے ہوئے پاکستان اور بھارت سے دیرپا جنگ بندی کے لیے مشاورت اور سفارتی حل پر زور دیا ہے۔چین کے وزیر خارجہ کا کہنا تھا چین پاکستان کی سالمیت اور خود مختاری کی حمایت جاری رکھے گا۔
دوسری جانب چینی وزیر خارجہ کی بھارتی قومی سلامتی مشیر اجیت دوول سے بھی گفتگو ہوئی جس میں انہوں نے کہا کہ پاکستان اور بھارت بات چیت سے مسائل کا حل نکالیں اور کشیدگی میں اضافہ نہ کریں۔
چینی وزارت خارجہ کی جانب سے جاری بیان میں بتایا گیا کہ مشیر بھارتی قومی سلامتی اجیت دوول نے وزیرخارجہ وانگ ژی سے گفتگو میں بتایا کہ پہلگام حملے میں بھارتی اہلکاروں کی ہلاکت ہوئی، بھارت کو دہشت گردی کے خلاف کارروائی کرنا پڑی۔
ڈوول نے مزید بتایا کہ جنگ بھارت کا انتخاب نہیں تھا، بھارت اور پاکستان جنگ بندی کیلئے پرعزم ہیں۔چینی وزارت خارجہ کا کہنا ہے کہ چین پہلگام حملے سمیت ہر قسم کی دہشت گردی کی مخالفت کرتا ہے، بھارت و پاکستان ہمسایہ ممالک ہیں انہیں امن و استحکام کو خطرے میں نہیں ڈالنا چاہیے۔
دوسری جانب اقوام متحدہ کی جنرل اسمبلی کے صدر فلیمون یانگ اورسیکرٹری جنرل انتونیو گوتریس نے پاک بھارت جنگ بندی کے اعلان کا خیر مقدم کیا ہے۔اقوام متحدہ کی جنرل اسمبلی کے صدر فلیمون یانگ نے اپنے بیان میں کہا کہ وہ پاکستان اور بھارت میں جنگ بندی کا خیر مقدم کرتے ہیں،دونوں ممالک میں جنگ بندی کشیدگی میں کمی کی جانب معنی خیز پیش رفت ہے۔
ان کا کہنا تھا کہ یہ سیز فائر دونوں ممالک کی جانب سے خطے میں امن و استحکام کیلئے عزم کا اظہار ہے۔فلیمون یانگ نے کہا کہ خطے میں امن وسلامتی کیلئے دونوں ممالک معاہدے پر عملدرآمد یقینی بنائیں، تمام معاملات اقوام متحدہ قوانین کے مطابق بات چیت اور سفارتکاری سے حل کیے جائیں۔
سیکرٹری جنرل اقوام متحدہ انتونیو گوتریس کا کہنا تھا کہ انہیں امید ہے یہ معاہدہ دیرپا قیام امن میں معاون ثابت ہوگا۔جنگ بندی سے دونوں ممالک میں دیرینہ مسائل کے حل کیلئے سازگار ماحول پیدا ہوگا۔
سعودی عرب کے وزیر مملکت برائے خارجہ عادل الجبیر نے نائب وزیراعظم اسحاق ڈار سے رابطہ کیا اور جنگ بندی معاہدے کا خیرمقدم کیا،اس موقع پر اسحاق ڈار نے جنوبی ایشیا میں امن و استحکام کے فروغ میں سعودی عرب کے مثبت و تعمیری کردار کو سراہا۔
