بلوچستان مسئلے کا حل، نواز شریف نے ہامی بھر لی

اسلام آباد:بلوچستان میں معاملے کے حل کی سیاسی کوششیں تیز ہوگئیں، سابق وزیر اعلیٰ بلوچستان ڈاکٹرعبدالمالک بلوچ نے نوازشریف سے ملاقات کی۔
ملاقات میں بی این پی کے دھرنے اور کارکنوں کی رہائی میں کردار ادا کرنے کی اپیل کرتے ہوئے ڈاکٹر عبدالمالک بلوچ نے کہا کہ بلوچستان کے عوام کو نواز شریف سے امیدیں ہیں۔ نواز شریف نے کہا کہ بلوچستان کا مسئلہ سیاسی ہے۔ سیاسی طریقے سے حل ہوگا۔
پارٹی ذرائع کے مطابق جاتی امرا میں ہونے والی اس اہم ملاقات کے موقع پر مسلم لیگ ن کے رہنما اور وفاقی وزراء اویس لغاری، احسن اقبال، پرویز رشید، خواجہ آصف، خواجہ سعد رفیق، احسن اقبال اور سردار اویس لغاری بھی ملاقات میں شامل تھے۔
میاں نواز شریف کی جانب سے ڈاکٹر عبدالمالک بلوچ اور ان کے وفد کے اعزاز میں ظہرانے کا بھی اہتمام کیا گیا۔ دونوں رہنمائوں نے ملاقات میں بلوچستان کے حالیہ واقعات، دہشت گردی کی صورتحال پر تبادلہ خیال کیا۔
ڈاکٹر عبدالمالک بلوچ نے میاں نواز شریف کو دورہ بلوچستان کی دعوت بھی دی اور مہنگائی کی رفتار اور بجلی کی قیمتوں میں کمی کرنے پر مبارکباد دی۔ملاقات کے بعد مسلم لیگ ن کے رہنما سعد رفیق کے ہمراہ میڈیا سے گفتگو میں ڈاکٹر عبدالمالک بلوچ نے کہا کہ نواز شریف نے یقین دہانی کرائی کہ وہ دوبارہ اپنے کردار کو فعال کریں گے۔
خواجہ سعد رفیق نے کہا کہ نواز شریف نے یقین دلایا کہ وہ بلوچستان میں امن کے لیے اپنا سیاسی اور جمہوری کردار ادا کریں گے۔وہ ذاتی طور پر اس مسئلے میں دلچسپی لے کر اس کا حل نکالیں گے۔