حکمران اتحاد پاکستان ڈیموکریٹک موومنٹ (پی ڈی ایم) کے ترجمان حافظ حمد اللّٰہ نے کہا ہے کہ آئین اور اسمبلیوں کو توڑنا آمروں کا کام ہے۔
ہنگو میں پریس کانفرنس کے دوران حافظ حمد اللّٰہ نے کہا کہ جنرل الیکشن اکتوبر2023ء میں ہوں گے، معاشی حالات ٹھیک نہ ہوئے تو الیکشن 6 ماہ مؤخر کرسکتے ہیں۔
انہوں نے کہا کہ سابق وزیراعظم عمران خان نے ملک کو معاشی طور پر کھوکھلا کیا۔
پی ڈی ایم ترجمان نے مزید کہا کہ عمران خان نے جاتے جاتے پاکستان کے ہاتھ پاؤں معاشی طور پر باندھ کر چھوڑے، آئین اور اسمبلیوں کو توڑنا آمروں کا کام ہے۔
ان کا کہنا تھا کہ پاناما کو بہانہ بنا کر نواز شریف کو نا اہل کر کے نیا سیاسی انتشار پیدا کیا گیا اور پی ٹی آئی کو بزور بازو مسلط کیا گیا تھا۔
حافظ حمد اللّٰہ نے یہ بھی کہا کہ پی ڈی ایم نے تحریک عدم اعتماد کے ذریعے مسلط کردہ حکومت کا خاتمہ کیا.
