اسلام آباد:امریکی اراکین کانگریس نے دورہ پاکستان کو کامیاب اور مثبت قرار دیتے ہوئے کہاکہ پاک امریکا تعلقات اہمیت کے حامل ہیں۔رکن کانگریس جیک وارن برگ مین نے کہا کہ پاک امریکا تعلقات اہمیت کے حامل ہیں، پاک امریکا تعلقات کی اہمیت کو مستقبل میں کم نہیں سمجھا جاسکتا، مثبت اثرات نہ صرف پاکستان بلکہ دیگر ترقی پذیر علاقوں پربھی مرتب ہونگے۔
جیک وارن برگ مین کا کہنا تھا کہ ہم مخصوص شعبوں میں کام کر رہے ہیں اور شراکت داری کو فروغ دے رہے ہیں،اس شراکت داری میں معدنیات ایک اہم شعبہ ہے، یہ اقدامات آنیوالے وقت میں مضبوط صنعتوں کی بنیاد رکھیں گے۔رکن کانگریس نے کہا کہ کان کنی کے نئے طریقے، نئی مصنوعات پیداواری مستقبل کیلئے اہم ہیں، پاک امریکا تعلقات اس لئے اہم ہیں کہ دونوں ملک آزادی پریقین رکھتے ہیں۔
کانگریس مین تھامس رچرڈ سوازی نے گفتگو کا آغاز السلام علیکم اور شکریہ سے کیا اور کہا پاکستان کا دورہ شاندار رہا،ہم پاکستانیوں کی میزبانی کے شکر گزار ہیں، ہمیں پاکستان اور امریکاکے تعلقات کو مضبوط بنیادوں پر استوار کرنا ہوگا۔
تھامس رچرڈ سوازی کا کہنا تھا کہ پاکستانی تارکین وطن کوایک سفیر کے طور پر دیکھتے ہیں ، پاکستانی تارکین وطن نے ہماری سر زمین پرکامیاں حاصل کیں، پاکستانیوں میں بے شمار خوبیاں ہیں، محنتی، تعلیم یافتہ اور خاندانی ہیں، پاکستان اورامریکاملکر کام کرینگے اور معاشی سرگرمیوں کوفروغ دیں گے۔
کانگریس مین جوناتھن لوتھر جیکسن نے بھی دورہ پاکستان کو خوش آئند قرار دیتے ہوئے کہا پاکستان میں ایمان، اتحاد اور نظم و ضبط کا عملی مظاہرہ دیکھا، اعتماد کی بنیاد پرتعلقات کو مزید مضبوط بنانے کا سنہری موقع ہے ، یقین ہے پاکستان کا مستقبل انتہائی روشن ہے۔
جوناتھن لوتھر جیکسن کا کہنا تھا کہ پاکستان میں مذہبی مقامات کادورہ کیا، اعلیٰ حکام سے ملاقاتیں بھی کیں، تعلقات مزید مستحکم اور پاکستان کی کامیابیوں کیلئے پرعزم ہوں۔
