پاکستانیوں کو سپین بھجوانے میں ملوث کئی گینگ بے نقاب

اسلام آباد:پاکستانیوں کو غیرقانونی طور پر سمندر کے راستے سپین بھجوانے میں ملوث متعدد گینگ بے نقاب ہوگئے۔ایف آئی اے امیگریشن کی اسلام آباد ایئرپورٹ پر بیرون ملک سے آئے 7 مسافروں سے پوچھ گچھ کے بعد سہولت کاری میں ملوث ملزم کو تحویل میں لے لیا گیا۔
ایف آئی اے کے مطابق مہتاب ، محمد خلیق، گل شامیر ، وسیم ،علی حسن ، بلاول اقبال اور عمر فاروق نجی ایئرلائنز کی دو پروازوں سے اسلام آباد پہنچے تھے ۔ عبدالغفار نامی سہولت کار بھی ان کے ہمراہ تھا۔پوچھ گچھ کے دوران مسافر وں نے بتایا کہ وہ براستہ دبئی سینیگال گئے تھے، وہاں سے غیرقانونی طریقے سے سپین جانے کی کوشش کی جو ناکام رہی، مسافروں نے ایجنٹس سے سپین جانے کیلئے لاکھوں روپے فی کس میں معاملات طے کئے تھے۔
ٍ مسافروں سے ایجنٹوں اور سہولت کاروں کے متعلق مزیدمعلومات لے جا رہی ہیں ۔ مسافر گجرات ، شیخوپورہ ، سیالکوٹ، منڈی بہاالدین ، ناروال ، راولپنڈی کے رہائشی ہیں۔ ابتدائی تفتیش کے مطابق ایجنٹوں کا تعلق پنجاب کے مختلف علاقوں سے ہے۔