کراچی:گڈز ٹرانسپورٹ ہڑتال کی وجہ سے صنعتوں تک خام مال کی رسائی معطل ہوگئی۔صدر آئرن مرچنٹس حماد پوناوالا نے کہا ہے کہ گڈز ٹرانسپورٹ کی ہڑتال کی وجہ سے مال نہ ملنے سے صنعتیں بند ہونے کا خدشہ ہے، لوہے کے تاجروں اور دیگر اشیاء کے امپورٹرزکو اربوں کا نقصان ہو رہا ہے۔
انہوں نے مزید کہا کہ ٹرانسپورٹرز ایسوسی ایشن سے گزارش ہے کہ مسئلے کو حل کریں۔دوسری جانب ہڑتال کی وجہ سے بندرگاہ پر جہازوں کی آمد و رفت متاثر ہے۔صدر کے سی سی آئی ریحان حنیف نے مطالبہ کیا کہ حکومت فوری مذاکرات کرکے ہڑتال ختم کروائے، ایکسل لوڈ کے قانون کو فالو کرنا چاہیے۔
اْنہوں نے مزید بتایا کہ بندرگاہ سے ہمارا مال ملک کے کسی حصے میں نہیں جا رہا، ہڑتال کی وجہ سے ایکسپورٹر اپنی کمٹمنٹ پوری نہیں کر پا رہا۔صدر کے سی سی آئی ریحان حنیف نے کہا کہ حکومت اور ٹرانسپورٹرز میں ثالثی کا کردار ادا کرنے کے لیے تیار ہیں۔
اس حوالے سے سابق صدر ایف پی سی سی آئی زبیر طفیل کا کہنا ہے کہ حکومت مسئلے کو سنجیدہ لے اور مسائل حل کروائے، نئے ٹرک آنے پر ہی ایکسل لوڈ کا قانون چل سکتا ہے۔اْنہوں نے مزید کہا کہ ہڑتال کی وجہ سے برآمدات تاخیرکا شکار ہیں، ہڑتال جاری رہی تو مختلف اشیاء کی قیمتوں میں اضافہ ہوگا۔
