لاہور:امیر جماعت اسلامی حافظ نعیم الرحمان نے کہا ہے کہ قوم ٹرمپ کی چاپلوسی میں کشمیر کا سودا قبول نہیں کرے گی، کشمیر کے مسئلہ کو حل کیے بغیر کوئی ثالثی قبول نہیں، اس لیے کشمیر کا سودا نہیں کرسکتے کہ ٹرمپ ہماری معیشت اچھی کردے گا۔
وقار سے کھڑے ہوں تو ساری دنیا ساتھ چلے گی، ٹرمپ کے آگے گرنے کی ضرورت نہیں ہے،قوم کا سودا کیا گیا تو سیاسی مزاحمت کو جماعت اسلامی لیڈ کرے گی۔
مخصوص نشستوں کے حوالے سے سپریم کورٹ کا فیصلہ عدالتی تاریخ کا ایک اور بدنما داغ ہے، مخصوص نشستیں تحریک انصاف کا حق تھا،ایک اصولی سیاست اور دوسری وصولی سیاست ہے، اصولی سیاست والی جماعتوں کو مخصوص نشستیں لینے سے انکار کرنا چاہیے۔
ان خیالات کااظہار انہوں نے لاہور میں ایک تقریب سے خطاب کرتے ہوئے کیا ۔حافط نعیم الرحمان نے کہا کہ سپریم کورٹ کے مخصوص نشستوں سے متعلق فیصلے پر افسوس ہوا، انہوں نے کہا کہ سپریم کورٹ سے جعلی فیصلے کروا کر سیٹیں حاصل کرنے کو یہ لوگ کامیاب سیاست کہتے ہیں۔
لوگ ایسے سیاستدانوں کو کامیاب سمجھتے ہیں جو کسی اصول پر نہیں حصول پر کھڑے ہوتے ہیں۔ اصولی سیاست کی بات کرنے والے سیٹیں وصول کرینگے یا نہیں یہ دیکھنا ہے۔ہر دونمبری سے اقتدارمیں رہنے والوں کوکامیاب سیاست دان کہا جاتا ہے۔
حافظ نعیم الرحمان نے کہا کہ ملک میں اقتدار کی میوزیکل چیئر چل رہی ہے،الیکشن میں جماعت اسلامی کے حق پرڈاکا ڈالا گیا، کراچی کی میئرشپ پر بھی ڈاکا ڈالا گیا ، کوئی مثال نہیں ملتی کہ الیکشن کمیشن جسے جیتا ہوا قرار دے وہ اپنی سیٹ واپس کردے ۔
حافظ نعیم الرحمن نے شکوہ کیا کہ عام انتخابات میں بھی ہماری جیتی ہوئی نشستیں نہیں دی گئیں، انہوں نے کہاکہ ہم سیاست کو عبادت سمجھ کر کرتے ہیں، ن لیگ اور پیپلز پارٹی سے تو مجھے کوئی توقع نہیں۔
امیر جماعت اسلامی نے کہا کہ اسٹیبلشمنٹ آج اپوزیشن سے بات کر لے تو یہ اس نظام کو قبول کرلیں گے، جب باجوہ صاحب کی ایکسٹینشن ہوئی تھی سب جماعتیں ایک تھیں، تنخواہیں بڑھانے کیلئے سب ایک ہو جاتے ہیں۔
انہوں نے کہا کہ پاک بھارت جنگ میں اللہ نے پاکستان کو سرخرو کیا۔حافظ نعیم الرحمن نے کہا کہ پونے دو سال میں بھرپور طاقت کے باوجود حماس کو ختم نہیں کیا جاسکا جب بھارت اور اسرائیل کو مار پڑی تو ٹرمپ نے ثالثی کروادی۔
