اسلام آباد:حکومت نے ملک میں بڑھتی ہوئی دہشت گردی کے تناظر میں پارلیمان کی قومی سلامتی کمیٹی کا اجلاس بلانے کا فیصلہ کیا ہے۔ ذرائع کا کہنا ہے کہ وزیراعظم شہباز شریف کی پارلیمانی قومی سلامتی کمیٹی کا اجلاس رواں ہفتے بلانے پر مشاورت جاری ہے۔
پارلیمان کی قومی سلامتی کمیٹی کا اجلاس بدھ یا جمعرات کو متوقع ہے ۔اجلاس اسپیکر قومی اسمبلی سردار ایاز صادق کی زیر صدارت ہوگا، وزیراعظم شہبازشریف بھی شرکت کریں گے۔اجلاس میں پارلیمانی قائدین، عسکری حکام، انٹیلی جنس اداروں کی قیادت شرکت کرے گی۔
سول و عسکری قیادت ملک میں بڑھتی دہشت گردی کے خلاف کارروائیوں سے متعلق مشاورت کرے گی۔ ذرائع کے مطابق اعلیٰ عسکری قیادت خیبرپختونخوا اور بلوچستان میں دہشت گردی کی بڑھتی وجوہات پر بریفنگ دے گی۔
اراکین کے سوالات کے جواب بھی دیئے جائیں گے، پارلیمانی کمیٹی میں آئندہ کی حکمت عملی بھی منظور کی جائے گی۔ذرائع کا کہنا ہے کہ چیئرمین پیپلزپارٹی بلاول بھٹو زرداری کی نیشنل ایکشن پلان ٹو کی تجویز کا بھی جائزہ لیا جائے گا، پارلیمنٹ کے فیصلے کی روشنی میں دہشت گردوں کے خلاف آپریشنز میں تیزی لانے سے متعلق فیصلے ہوں گے، قومی ایکشن پلان پر عمل درآمد کا بھی جائزہ لیا جائے گا۔
