ایران اور امریکا کے درمیان متوقع جنگ بندی مذاکرات کے تناظر میں پاکستانی قیادت کے متوازن اور ذمہ دارانہ کردار کو دنیا بھر میں سراہا جا رہا ہے۔
عالمِ اسلام کی معروف علمی شخصیت شیخ الاسلام مفتی تقی عثمانی نے بھی اپنے سوشل میڈیا پیغام میں کہا ہے کہ پاکستان کو اللہ تعالیٰ نے ایک نہایت نازک موقع پر اہم سفارتی ذمہ داری ادا کرنے کی توفیق عطا فرمائی، جس کے باعث دنیا بھر میں ملک کا وقار نمایاں طور پر بلند ہوا ہے۔
انہوں نے کہا کہ کل ہونے والے مذاکرات کی کامیابی نہ صرف عالمِ اسلام بلکہ پوری دنیا کے مفاد میں ہے۔
الحمدللہ ایران امریکا جنگ رکوانے میں پاکستانی قیادت کواللہ تعالی نے انتہائی نازک اور متوازن کردار ادا کرنے کی توفیق عطا فرمائی اسکی وجہ سے دنیا بھر میں ملک کا وقار غیر معمولی طورپر بلند ھوا اور کل جو مذاکرات ھونے والے ھیں انکی کامیابی پر عالم اسلام بلکہ پوری دنیا کا مفاد وابستہ…
— Muhammad Taqi Usmani (Official) (@muftitaqiusmani) April 10, 2026
انہوں نے وزیرِ اعظم کی جانب سے عوام سے دعا کی اپیل کو بروقت قرار دیتے ہوئے کہا کہ تمام معاملات اللہ تعالیٰ کے ہاتھ میں ہیں، اس لیے قوم کو بالخصوص دعاؤں کا اہتمام کرنا چاہیے۔
پیغام میں خاص طور پر دعائے مسنون پڑھنے کی تلقین بھی کی گئی تاکہ مذاکرات کامیاب ہوں اور خطے میں امن و استحکام کو فروغ ملے۔
واضح رہے کہ ایران اور امریکا کے درمیان جنگ بندی کے بعد دونوں ممالک کے درمیان اہم مذاکرات اسلام آباد میں ہونے جارہے ہیں، جنہیں خطے میں کشیدگی کم کرنے اور امن کے قیام کی جانب اہم پیش رفت قرار دیا جا رہا ہے۔
