اسلام آباد:یورپی یونین اور امریکی ماہرین کے مطابق سال 2025 دنیا کا تیسرا گرم ترین سال ثابت ہوا،جس کے ساتھ ہی زمین پر غیر معمولی حدت کا سلسلہ مزید طویل ہوگیا۔
یورپی یونین کے کوپرنیکس کلائمیٹ چینج سروس اور امریکی تحقیقی ادارے برکلے ارتھ کی رپورٹس کے مطابق گزشتہ 11 سال دنیا کے گرم ترین سال رہے ہیں جن میں 2024 سب سے زیادہ گرم جبکہ 2023 دوسرے نمبر پر رہا۔
ماہرین کے مطابق گزشتہ تین برسوں میں پہلی مرتبہ عالمی درجہ حرارت صنعتی دور سے پہلے کے مقابلے میں اوسطاً 1.5 ڈگری سینٹی گریڈ سے تجاوز کر گیا۔برکلے ارتھ کا کہنا ہے کہ 2023 سے 2025 کے دوران درجہ حرارت میں اضافہ غیر معمولی رہا جو زمین کے تیزی سے گرم ہونے کی نشاندہی کرتا ہے۔
کوپرنیکس کی رپورٹ میںخبردار کیا گیا ہے کہ 1.5 ڈگری کی حد اس دہائی کے اختتام سے پہلے ہی عبور ہو سکتی ہے جو پہلے کے اندازوں سے کہیں زیادہ جلد ہے۔رپورٹس کے مطابق 2025 میں عالمی درجہ حرارت صنعتی دور سے پہلے کے مقابلے میں 1.47 ڈگری سینٹی گریڈ زیادہ رہا۔ دنیا بھر میں تقریباً 77 کروڑ افراد نے اپنے علاقوں میں ریکارڈ گرم موسم کا سامنا کیا۔
