جنرل فیض حمید کو اپنے جرائم کی سزا ملی، فیصلہ تاریخی ہے، بلاول بھٹو

چنیوٹ: پاکستان پیپلز پارٹی کے چیئرمین بلاول بھٹو زرداری نے پاکستان تحریک انصاف (پی ٹی آئی) کے بانی چیئرمین عمران خان کو سیاسی فرعون قرار دیتے ہوئے کہا کہ دو سیاسی فرعون دیکھے، عمران خان طاقت کے نشے میں دھمکیاں دیتے تھے، آج مکافات عمل سے گزر رہے ہیں، جنرل فیض کو اپنے جرائم کی سزا ملی، فیصلہ تاریخی ہے۔
جمعرات کو چنیوٹ میں میڈیا سے گفتگو کرتے ہوئے سابق وزیر خارجہ بلاول بھٹو زرداری نے کہا کہ دورہ پنجاب کامیاب رہا، کارکنان سے ملاقاتیں ہوئیں، خیبرپختونخوا میں گورنرراج سے متعلق بات نہیں ہوئی۔ بلاول بھٹو نے کہا کہ فیض حمید سے متعلق تاریخی فیصلہ ہے، فیض حمید کو جرم کے مطابق 14 سال قید ہوئی ہے، میں نے وقت کے 2 فرعون دیکھے ہیں، ایک فرعون بانی پی ٹی آئی ہیں، طاقت کے نشے میں فیصلے ہوتے تھے، بانی پی ٹی آئی طاقت کے نشے میں دھمکیاں دیتے تھے۔
چیئرمین پیپلز پارٹی کا کہنا تھا کہ اللہ ذمہ داری دیتا ہے تو عملدر آمد کرنا چاہیے، فریال تالپور اور مریم نواز کو جیل میں ڈالا گیا، آج بانی پی ٹی آئی خود جیل میں ہیں، یہ مکافات عمل ہے، بانی پی ٹی آئی کو اپنے جرائم کا جواب دینا ہوگا۔انہوں نے مزید کہا کہ میثاق جمہوریت کے مطابق آئینی عدالت بنائی گئی، فیض حمید کے خلاف مزید ٹرائل باقی ہے، ہم صوبائی حکومت کے اختیارات کے حق میں ہیں۔
سابق وزیر خارجہ بلاول بھٹو نے یہ بھی کہا کہ ملکی معیشت درست سمت میں گامزن ہے، پی ڈی ایم حکومت نے ملکی معیشت کو سنبھالا۔ بلاول بھٹو زرداری نے کہا کہ خیبرپختونخوا میں گورنرراج سے متعلق باقاعدہ ڈسکشن نہیں ہوئی، گورنر راج ایک آئینی آپشن موجود ہے، پی ٹی آئی اپنے طرزعمل سے وفاق کو مجبور کر رہی ہے اور پی ٹی آئی کی سیاست خود ایسے حالات پیدا کرنا چاہ رہی ہے۔
ان کا کہنا تھا کہ پی ٹی آئی دور میں مریم نواز اور فریال تالپور کو ٹارگٹ کیا گیا، آج عمران خان خود جیل میں ہے۔ انہوں نے کہا کہ ہم نے آئینی عدالت بھی بنا دی ہے، ہمارے نظریے اورمنشور کی جیت ہے، آئینی عدالت کا قیام پیپلزپارٹی کی بڑی کامیابی ہے۔
ان کا کہنا تھا کہ سب کو کوشش کرنی چاہیے وفاق کی مشکلات دور کی جائیں، وفاق کی مالی مشکلات دور کرسکتے ہیں اور اس کے لیے پی پی پی تعاون جاری رکھے گی، صوبے کے اختیارات کم کیے بغیر وفاق کی مشکلات کم کرسکتے ہیں۔ بلاول بھٹو زرداری نے کہا کہ عوام کے لیے معاشی مشکلات ضرور ہیں۔