اسلام آباد:سینیٹر فیصل واوڈا نے کہا کہ میں نے پوری پی ٹی آئی کو لٹو کی طرح نچایا ہوا ہے، بڑے بڑے اعلامیے آرہے ہیں۔
انہوں نے مزید کہاکہ پی ٹی آئی نے بانی کو مائنس کردیا، یہ صرف ڈرامے بازی کررہے ہیں، پارلیمنٹ کی کمیٹی میں عمران خان سے لاتعلقی ظاہر کی گئی وہ تو سائیڈ ہوگئے۔
ایک انٹرویو میںانہوں نے کہا کہ عمران خان کو جتنی تکلیف ملے گی موجودہ پارٹی قیادت کی سیاست چمکتی جائے گی، پی ٹی آئی کو چچا کی زبان سمجھ میں آگئی جو یہ زبان سمجھتے ہیں۔
فیصل واوڈا نے کہا کہ پارلیمانی پارٹی اور گزشتہ روز کی پریس کانفرنس میں دیکھ لیا، عمران خان کو مائنس کررہے ہیں۔ سینیٹر فیصل واوڈا نے کہا کہ نالائق عارضی وزیر اعلی صرف 10 یا 20 سیکنڈز کی ویڈیو بناتا ہے، یہ اڈیالہ جیل کیوں نہیں آئے؟۔
انہوں نے کہا کہ سینیٹر خرم ذیشان بہت جلد سینیٹر نہیں رہیں گے، نااہلی، پابندی، گورنر راج، 9 مئی کیسز کا منطقی انجام، غداری کیس سب باری باری ہوگا۔
سینیٹر نے کہا کہ خرم ذیشان نے ڈیجیٹل دہشت گردی کی ہے اسے ڈھونڈیں گے اور پکڑیں گے، 9 مئی کے بھگوڑوں کو بھی پکڑ کر لائیں گے چاہے جہاں بھی ہوں۔
فیصل واوڈا کا کہنا ہے کہ آج سے پاکستان کی اچھی خبریں آنا شروع ہوجائیں گی، ملک میں چیزیں بہتری کی جانب جارہی ہیں۔
