اسلام آباد:الیکشن کمیشن نے لوکل گورنمنٹ ایکٹ میں حالیہ ترمیم کو مسترد کرتے ہوئے اسلام آباد میں بلدیاتی انتخابات فوری کرانے کا اعلان کرتے ہوئے قرار دیا ہے کہ یونین کونسل سیکرٹری کو بلدیاتی انتخابات کرانے کی ذمہ داری دینا آئین و قانون سے متصادم ہے۔
الیکشن کمیشن کے اعلامیہ کے مطابق اسلام آباد کی لوکل گورنمنٹس کی میعاد 14فروری 2021ء کوختم ہوئی، وفاقی حکومت آئین کے آرٹیکل 140ـA،219 اور120دن کے اندر انتخابات کا انعقاد کرنے کی پابند ہے۔
اعلامیہ کے مطابق انتخابات کئی وجوہات کی بنیاد پر ملتوی ہوتے رہے، الیکشن کمیشن نے 5 دفعہ حلقہ بندی کی اور 3دفعہ الیکشن کا شیڈول دیا، متعلقہ اداروں سے خط و کتابت بھی کی گئی مگر بلدیاتی انتخابات کا انعقاد نہ ہوسکا۔
الیکشن کمیشن نے الیکشن کے انعقاد کیلئے 13نومبر 2025ء کو کیس کی باقاعدہ سماعت کی، الیکشن کے انعقاد کا فیصلہ 17نومبر 2025ء کو صادر کیا، الیکشن شیڈول فوری پیش کرنے کی ہدایت دی گئی۔
اعلامیہ میں قرار دیا گیا کہ ایکٹ 2015ء کے سیکشن(2) 15 میں حالیہ ترمیم میں سیکرٹری یونین کونسل کو الیکشن کرانے کی ذمہ داری دینا آئین و قانون سے متصادم ہے، الیکشن کمیشن کو پابند نہیں کیا جاسکتا کہ لوکل گورنمنٹ الیکشن سیکرٹری یونین کونسل کی ذمہ داری ہو۔
الیکشن کمیشن نے واضح کیا کہ الیکشنز ایکٹ 2017ء اور لوکل گورنمنٹ ایکٹ 2015ء کی متعلقہ دفعات کے تحت ڈی آر اوز، آر اوز اور اے آر اوز کی تعیناتی کا اختیار کمیشن کو حاصل ہے، الیکشن کمیشن اپنے افسران، عدلیہ یا انتظامیہ کے افسران و اہلکاران کو بطور ریٹرننگ آفیسر اور انتخابی عملہ تعینات کرسکتا ہے۔
الیکشن کمیشن نے فیصلہ دیا کہ سیکرٹری یونین کونسل ”سرکاری آفس” کی تعریف پربھی پورا نہیں اترتا، سیکرٹری یونین کونسل کو پریذائنڈنگ افسرتعینات نہیں کیا جا سکتا، انتخابی عمل انہی افسران کے ذریعے منعقد ہوگا جن کی تقرری بذریعہ نوٹیفکیشن الیکشن کمیشن کرے گا۔
