لاہور /کراچی: پنجاب حکومت اور فلورملز مالکان میں معاملات طے پا گئے،ملز مالکان نے مشروط مقدار میں آٹا سپلائی کرنے پر آمادگی ظاہر کردی۔ذرائع کا کہنا ہے کہ پنجاب بھر کی 800 ملز10 اور 20 کلو آٹے کا تھیلا سرکاری نرخوں پرمارکیٹ میں سپلائی کریں گی۔
ذرائع فلورملز ایسوسی ایشن کے مطابق حکومت فلور ملوں کو ایک لاکھ ٹن گندم ماہانہ دے گی، ملٹی نیشنل کمپنیاں 25 لاکھ بوری گندم 3 ہزارروپے من میں فراہم کرنے پرآمادہ ہوگئیں۔ ملٹی نیشنل کمپنیوں کے نمائندے ڈی جی فوڈ سے ملاقات میں مقدار اور طریقہ کار طے کریں گے۔
معاون خصوصی برائے پرائس کنٹرول سلمیٰ بٹ کا کہنا ہے کہ حکومت اورملز گندم آٹا بحران سے متعلق سفارشات تیارکر رہے ہیں، فلورملزکا حکومت سے تعاون خوش آئند ان کی سفارشات پرغور کیا جارہا ہے، پنجاب کی مارکیٹ میں آٹے کی سپلائی بحال رہے گی، گندم اور آٹے کی قیمت نہیں بڑھے گی، استحکام آجائے گا۔
ادھرکراچی میں تندور مالکان نے مختلف اقسام کی روٹیوں کی قیمتوں میں فی روٹی اوسطاً 2 روپے کا اضافہ کردیا ہے جبکہ برانڈڈ آٹے کی قیمتوں میں نمایاں اضافہ دیکھنے کو مل رہا ہے، کچھ مل مالکان نے 5 کلو فائن آٹے کے تھیلے کی قیمت 700 روپے تک بڑھا دی ہے جو یکم اگست کو 500 روپے اور یکم ستمبر کو 600 روپے تھی، حالاں کہ اس سال کے شروع میں نئی گندم کی فصل آ چکی تھی۔
ریٹیلرز کا کہنا ہے کہ بڑے تاجر زیادہ طلب کے باعث پرانے آٹے کے ذخائر بیچ کر منافع کما رہے ہیں۔
ماہرین کے مطابق موجودہ گندم بحران کا حالیہ پنجاب اور دیگر علاقوں میں آنے والے سیلاب سے کوئی تعلق نہیں، کیوں کہ نئی گندم کی کٹائی مارچ/اپریل میں ہوچکی تھی تاہم ذخیرہ اندوز اور سرمایہ کار بڑی مقدار میں گندم روک کر بیٹھے ہیں تاکہ سپلائی اور ڈیمانڈ کے تحت مزید قیمتوں کے بڑھنے کا انتظار کر سکیں۔
آل سندھ شیرمال تندور روٹی ایسوسی ایشن کے رکن سلمان میاں آرائیں نے بتایا کہ جو تندور والے پہلے 180 گرام وزن کا نان 22 اور 23 روپے میں فروخت کر رہے تھے، انہوں نے اب قیمت 25 روپے کر دی ہے۔اسی طرح چپاتی کی قیمت 2 روپے بڑھ گئی ہے جو اب 14 سے 15 روپے میں مل رہی ہے۔
سلمان میاں آرائیں کے مطابق فائن آٹے کے 50 کلو تھیلے کی قیمت صرف ایک ماہ میں ایک ہزار 900 روپے بڑھ کر 5 ہزار 700 روپے تک پہنچ گئی ہے، جو پہلے 3 ہزار 800 روپے تھی۔
سلمان میاں آرائیں کے مطابق 40 کلو گندم کے تھیلے کی قیمت اب 3 ہزار 943 روپے ہوچکی ہے جو کہ فی 100 کلو 9 ہزار 857 روپے بنتی ہے جو گزشتہ 72 ہفتوں میں سب سے زیادہ ہے، اس سطح پر قیمتیں آخری بار اپریل 2024ء میں دیکھی گئی تھیں۔
