راولپنڈی:فیلڈ مارشل عاصم منیر کے صدر بننے کی افواہوں پر ڈی جی آئی ایس پی آر لیفٹیننٹ جنرل احمد شریف چودھری کا دو ٹوک موقف سامنے آگیا۔لیفٹیننٹ جنرل احمد شریف چودھری نے معروف بین الاقوامی جریدے ”دی اکانومسٹ” کو دیے گئے خصوصی انٹرویو میں واضح کیا ہے کہ فیلڈ مارشل عاصم منیر کے صدر پاکستان بننے سے متعلق تمام قیاس آرائیاں مکمل طور پر بے بنیاد اور جھوٹ پر مبنی ہیں۔
ڈی جی آئی ایس پی آر نے معرکہ حق کے بعد سامنے آنے والے سیاسی تجزیوں کو سختی سے مسترد کرتے ہوئے کہا کہ ایسی خبروں کا مقصد صرف غلط فہمیاں پیدا کرنا ہے۔انہوں نے کہا کہ پاکستان کی فوج آئینی دائرہ کار میں کام کر رہی ہے اور اس قسم کی افواہیں صرف سیاسی فضا کو خراب کرنے کی کوشش ہے۔
ایسے تجزیے محض قیاس آرائیاں ہیں ان کا حقیقت سے کوئی تعلق نہیں۔انٹرویو کے دوران بھارتی جارحیت سے متعلق سوال پر لیفٹیننٹ جنرل احمد شریف چودھری کا کہنا تھا کہ اگر بھارت کسی فوجی مہم جوئی کا سوچتا ہے تو پاکستان اس بار ردعمل کا آغاز مشرقی سرحد سے کرے گا۔
اْن کا کہنا تھا کہ ہم حملے کی شروعات بھارت کے اندر گہرائی میں جا کر کریں گے تاکہ بھارت کو یہ پیغام دیا جا سکے کہ وہ بھی ہر جگہ مارے جا سکتے ہیں۔
ڈی جی آئی ایس پی آر نے واضح کیا کہ پاکستان بھارتی وزیر اعظم نریندر مودی کی جانب سے کسی بھی ممکنہ دہشت گردانہ حملے کو سنجیدگی سے لے گا اور اس کا جواب بھرپور اور مؤثر فوجی کارروائی کے ذریعے دیا جائے گا اورکسی بھی جارحیت کا جواب معرکہ حق سے زیادہ سخت ہوگا۔ ڈی جی آئی ایس پی آر نے کہا کہ پاکستان خطے میں امن کا خواہاں ہے مگر اس کی خواہش کو کمزوری نہ سمجھا جائے۔
