2026ء کے پہلے دن ہی پاکستان کیلئے اچھی خبر ، کوہاٹ میں تیل اور گیس کے بڑے ذخائر دریافت ہوئے ہیں۔ترجمان آئل اینڈ گیس ڈیولپمنٹ کمپنی (او جی ڈی سی ایل) کے اعلامیہ کے مطابق کوہاٹ میں ناشپا بلاک سے تیل اور گیس کی دریافت ہوئی ہے۔براگزئی ایکس 1کنویں میں 5170میٹر تک ڈرل کیا گیا، جس کے بعد ایک دن میں 4100بیرل تیل اور10.5ملین مکعب فٹ گیس کی پیداوار حاصل ہوئی۔
وزیراعظم شہباز شریف کی زیر صدارت پیٹرولیم ڈویژن کے امور پر اہم اجلاس ہوا جہاں پیٹرولیم اور گیس سیکٹر کے روڈمیپ کے حوالے سے بریفنگ دی گئی اور بتایا گیا کہ آئل اینڈ گیس ڈیولپمنٹ کمپنی (او جی ڈی سی ایل) نے ضلع کوہاٹ میں ناشپا بلاک میں تیل و گیس کے بڑے ذخائر دریافت کر لیے ہیں۔بریفنگ میں بتایا گیا کہ آر ایل این جی کے کنکشنز پر تیزی سے کام جاری ہے اور جون 2026ء تک 3لاکھ 50ہزار کنکشنز کا ٹارگٹ مکمل کرلیا جائے گا، شیوا گیس فیلڈ اور بٹانی گیس فیلڈ کے لیے پائپ لائنز کو کمیشن کیا جا چکا ہے جبکہ کوٹ پالک گیس فیلڈ سے پائپ لائن پر کام جاری ہے۔
وزیراعظم شہباز شریف نے ناشپا بلاک میں تیل اور گیس کے بڑے ذخائر کی دریافت پر قوم کو مبارک باد دی اور متعلقہ اداروں کے کام کی تعریف کی۔اجلاس کی شرکا سے گفتگو کرتے ہوئے وزیراعظم نے کہا کہ ملک میں تیل و گیس کے نئے ذخائر کی دریافت ہماری ترجیحات میں شامل ہونی چاہیے تاکہ پیٹرولیم مصنوعات کی درآمد کی مد میں خرچ ہونے والا زر مبادلہ بچایا جا سکے۔
انہوں نے تیل و گیس سپلائی چین کو درآمد ہونے سے لے کر صارفین کے استعمال تک ترجیحی بنیادوں پر ڈیجیٹائز کرنے کی ہدایت کی اور کہا کہ تیل و گیس کی ترسیل کی سپلائی چین کی ڈیجیٹائزیشن سے ان مصنوعات کی اسمگلنگ کی روک تھام ممکن ہوگی اور قومی خزانے کو فائدہ پہنچے گا۔
