نیشنل سائبر کرائم ایجنسی (NCCIA) نے صرف 4ماہ کے دوران سائبر کرائمز میں ملوث 690افراد کو گرفتار کرلیا ہے۔ ترجمان کے مطابق اپریل سے جولائی 2025ء کے دوران 7,247شکایات پر باضابطہ تحقیقات کا آغاز کیا گیا جن میں سے 457کیسز میں ایف آئی آرز درج ہوئیں۔
عدالتوں نے اب تک 22مقدمات میں سزائیں بھی سنائیں۔ گرفتار افراد سے مالیاتی فراڈ اور دیگر سائبر جرائم میں حاصل شدہ کروڑوں روپے کی ریکوریاں عمل میں لائی گئیں۔ڈپٹی ڈائریکٹر آپریشنز NCCIA عثمان خان کے مطابق ایجنسی کے قیام کے بعد صرف اپریل تا جولائی 2025ء کے دوران 50,563سائبر کرائم شکایات موصول ہوئیں جن میں مالیاتی فراڈ، بلیک میلنگ، ہراسانی اور ہیکنگ جیسے جرائم نمایاں تھے۔
”آپریشن گرے”کے تحت غیر ملکی عناصر، جو بیرون ملک کال سینٹرز کی آڑ میں پاکستان میں فراڈ کر رہے تھے، کے خلاف بھی کارروائیاں کی گئیں۔ کروڑوں روپے کی رقم برآمد کر کے قانونی کارروائی جاری ہے۔ عثمان خان نے عوام سے اپیل کی ہے کہ سائبر جرائم کی فوری اطلاع متعلقہ سائبر سرکل یا ہیلپ لائن پر دیں تاکہ بروقت کارروائی ممکن بن سکے۔
