پشاور:وزیراعلیٰ خیبر پختونخوا علی امین گنڈاپور نے بانی پی ٹی آئی عمران خان کی گرفتاری کو غیر آئینی اور غیر قانونی قرار دیتے ہوئے 5 اگست سے حقیقی آزادی کی تحریک شروع کرنے کا اعلان کیا ہے۔
اپنے ایک بیان میں علی امین گنڈا پور نے کہا کہ بانی ٹی آئی عمران خان کی غیر قانونی اور غیر آئینی گرفتاری اور سزا کو نہیں مانتے، سزائیں عوام کی رائے اور آئین پر حملہ ہے۔ان کا کہنا تھاکہ تمام کیے گئے غیر قانونی فیصلوں کو واپس لینا ہو گا، پی ٹی آئی کو ختم کرنے والے آج ماضی کا قصہ بنتے جا رہے ہیں۔
ہم سچ کے ساتھ کھڑے ہیں اور ہر قسم کی قربانی دینے کیلئے تیار ہیں۔ وزیر اعلیٰ خیبر پختونخوا نے کہا کہ 5 اگست سے پاکستان کی حقیقی آزادی کی تحریک شروع ہو گی۔
دوسری جانب خیبرپختونخوا حکومت نے آج امن و امان سے متعلق آل پارٹیز کانفرنس طلب کرلی۔وزیراعلیٰ علی امین گنڈاپور نے سیاسی جماعتوں اور مختلف مکاتب فکر کو دعوت نامے ارسال کردیے، وزیراعلیٰ علی امین گنڈا پور نے کہاکہ دہشت گردی کے خلاف موثر حکمت عملی کیلئے تمام سیاسی قوتوں کو ایک پلیٹ فارم پر لانا ہوگا۔
وزیراعلیٰ کا کہنا تھا کہ صوبے میں امن و امان کی بحالی سب کی مشترکہ ذمہ داری ہے، دہشت گردی کا دوبارہ سر اٹھانا تشویشناک ہے، مل کر مقابلہ کرنا ہوگا، ہم سب کو اختلافات سے بالاتر ہو کر امن کیلئے اکٹھا ہونا ہوگا۔
علی امین گنڈاپور نے ملک میں جاری صورتحال پر کڑی تنقید کرتے ہوئے کہا کہ پاکستان میں انصاف کا جنازہ نکالا جا چکا ہے اور پی ٹی آئی رہنمائوں کو دی جانے والی سزائیں آئین و قانون کی صریح خلاف ورزی ہیں۔
انہوں نے ڈاکٹر یاسمین راشد سمیت دیگر بے گناہ رہنمائوں کو سزا دیے جانے کو ظلم قرار دیا۔وزیر اعلی خیبرپختونخوا نے واضح کیا کہ ہر ظلم کی رات ختم ہوتی ہے، حق کی فتح یقینی ہے۔
