پاکستان میں آن لان خریداری کا رجحان تیزی سے فروغ پارہا ہے، کھانے پینے کی اشیا سے لے کر دوا، کپڑے، جوتے اور گھریلو سامان تک اب سب کچھ گھرکی دہلیز پر حاصل کرنا رجحان کے ساتھ پاکستانیوں کی ضرورت بھی بن گئی ہے۔ایشیائی ترقیاتی بینک کی جانب سے ایک رپورٹ میں بتایا گیا کہ 2024ء میں پاکستانیوں نے 10.4 ارب ڈالرز کی آن لائن شاپنگ کی، زیادہ تر لوگ الیکٹرانکس، فیشن، بیوٹی پراڈکٹس اورلگڑری آئٹمز پر خرچ کر رہے ہیں۔
رپورٹ میں کہا گیا کہ الیکٹرانکس کے علاوہ، آن لائن ہوائی ٹکٹ کی بکنگ دوسرے سب سے بڑے حصے کے طور پر ابھری، جو تقریباً 2.3 بلین ڈالر سالانہ کما رہی ہے۔پروازوں، ہوٹلوں اور چھٹیوں کے لیے آن لائن بکنگ بھی تیزی سے بڑھ رہی ہے، جس سے 2027 ء تک آن لائن شاپنگ کا حجم بارہ بلین ڈالرزتک پہنچنے کی توقع ہے۔
فیشن کی خریداری، بشمول لباس اور لوازمات، تقریباً 1 بلین ڈالر ریکارڈ کی گئی، جو نوجوان صارفین کے انداز اور سہولت کے لیے ڈیجیٹل شاپنگ کو اپنانے کے بڑھتے ہوئے رجحان کی عکاسی کرتی ہے۔اے ڈی بی کی رپورٹ میں بتایا گیا کہ اسی فیصد پاکستانی خریدارموبائل فونزسے آن لائن خریداری کرتے ہیں، جبکہ تیرانوے اعشاریہ سات فیصد صارفین آن لائن فراڈ سے بچاؤ کے لیے اب بھی کیش آن ڈیلیوری کو ترجیح دیتے ہیں۔
