ایران اور اسرائیل کے درمیان بڑھتی ہوئی کشیدگی کے درمیان، سوشل میڈیا پر اس وقت سفارتی ہلچل مچ گئی جب بھارت کی سب سے قریبی اتحادی سمجھی جانے والی اسرائیلی فوج نے مقبوضہ جموں و کشمیر کو پاکستان کا حصہ قرار دے دیا۔
سرکاری اسرائیل ڈیفنس فورسز (IDF) نے گزشتہ شب ایران کے حوالے سے ایک ٹویٹ کیا، جس کے ساتھ ایک نقشہ بھی منسلک تھا۔اس نقشے میں مقبوضہ جموں و کشمیر کو پاکستان کا حصہ دکھایا گیا، ساتھ ہی چینی سرحد سے منسلک متنازعہ علاقوں کو بھی چین کا ہی حصہ دکھایا دیا۔
اسرائیل کی جانب سے ایسا نقشہ جاری ہونا دہلی کے لیے شدید سبکی کا باعث بن گیا، جموں و کشمیر اور لداخ تاریخی طور پر پاکستان اور چین کا حصہ ہیں، جن پر بھارت نے محض قبضہ کر رکھا ہے، اور عالمی سطح پر ایسے نقشے اس سچائی کی گونج ہیں۔
بھارتی سوشل میڈیا صارفین مذکورہ نقشے پر مبنی پوسٹ دیکھ کر ناصرف حیران ہیں بلکہ اسرائیلی افواج پر برہمی کا اظہار بھی کیا۔بھارتیوں نے اسرائیلی حکام کو آڑے ہاتھوں لیا اور ساتھ میں پوسٹ ڈیلیٹ کرنے کا مطالبہ بھی کیا۔
