وزیردفاع خواجہ آصف نے گزشتہ روز تصدیق کی کہ پاک فضائیہ نے بھارت کے حالیہ میزائل حملوں کے جواب میں بھارتی فضائیہ کے پانچ لڑاکا طیارے مار گرائے ہیں۔ ان کے مطابق مار گرائے گئے طیاروں میں تین رافیل، ایک مگ-29 اور ایک سخوئی-30 شامل ہیں۔
اس دعوے کی مزید توثیق ایک اعلیٰ فرانسیسی انٹیلی جنس افسر کے بیان سے بھی ہوئی، جس نے سی این این کو بتایا کہ گرائے گئے طیاروں میں سے ایک رافیل بھی شامل تھا، جو فرانسیسی ساختہ جدید لڑاکا طیارہ ہے اور حال ہی میں بھارت نے اسے اپنی فضائیہ میں شامل کیا ہے۔
رافیل جیسے جدید طیارے کا نقصان بھارتی فضائیہ کے لیے ایک بڑا دھچکا ہے، آئیے اب جائزہ لیتے ہیں کہ دونوں ملکوں میں سے کس ملک کی فضائیہ کو برتری حاصل ہے۔
بھارتی فضائیہ دنیا کی چوتھی بڑی فضائی قوت ہے اور اسے عددی و تکنیکی لحاظ سے پاکستان پر برتری حاصل ہے، خاص طور پر طویل فاصلے تک مار کرنے کی صلاحیت میں۔
تاہم پاک فضائیہ دنیا کی ساتویں بڑی فضائی قوت ہونے کے باوجود جدید نظاموں جیسے J-10C، JF-17 Block III اور F-16 کی مدد سے ایک متحرک اور فوری ردعمل دینے والی طاقت کے طور پر جانی جاتی ہے۔
ایک اہم پہلو پائلٹ سے طیارے کے تناسب کا ہے۔ بھارتی میڈیا “دی پرنٹ” کے مطابق بھارتی فضائیہ میں ہر طیارے کے لیے اوسطاً 1.5 پائلٹ دستیاب ہیں، جبکہ پاکستانی فضائیہ میں یہ تناسب 2.5 پائلٹس فی طیارہ ہے۔
اس فرق کی بدولت پاک فضائیہ اپنی فورس کو دن رات بغیر تھکے مؤثر انداز میں چلا سکتی ہے۔ طیارے تو ایک دن میں چھ پروازیں بھی کرسکتے ہیں، مگر پائلٹ کی انسانی برداشت محدود ہوتی ہے۔ زیادہ پائلٹس کی دستیابی سے پاک فضائیہ کو عملے کو باری باری آرام دینے کی سہولت ملتی ہے، جس سے جنگی رفتار کو قائم رکھنا ممکن ہوتا ہے۔
