اسلام آباد :بجٹ اور عیدالاضحی سے قبل ملک میں مہنگائی میں اضافے کا خدشہ ہے۔میڈیا رپورٹ کے مطابق وزارت خزانہ نے ماہانہ معاشی اپ ڈیٹ اینڈ آؤٹ لک میں مہنگائی سے متعلق تخمینہ جاری کردیا، مئی میں مہنگائی ممکنہ طور پر بڑھ کر 3 سے 4 فیصد کے درمیان تک پہنچ سکتی ہے۔
وزارت خزانہ کے مطابق رواں ماہ اپریل میں مہنگائی 1.5 فیصد سے 2 فیصد کے درمیان رہنے کی توقع ہے، ملک میں مارچ 2025 کے دوران مہنگائی کی شرح 0.69 فیصد ریکارڈ کی گئی تھی۔جولائی 2024 سے مارچ 2025 کے دوران مہنگائی کی اوسط شرح 5.25 فیصد تھی۔
وزارت خزانہ کی ماہانہ معاشی اپ ڈیٹ اینڈ آؤٹ لک رپورٹ میں کہا گیا ہے کہ رواں مالی سال کے 9 ماہ میں ترسیلات زر، برآمدات اور درآمدات میں اضافہ ہوا، کرنٹ اکاؤنٹ سرپلس رہا جب کہ براہ راست بیرونی سرمایہ کاری میں اضافہ ہوا۔
رپورٹ کے مطابق رواں مالی سال کے دوران اسٹیٹ بینک ذخائر میں اضافہ ریکارڈ کیا گیا، جولائی تا مارچ ترسیلات زر 33.2 فیصد اضافے سے 28 ارب ڈالرز سے زائد رہیں۔وزارت خزانہ کی رپورٹ میں کہا گیا ہے کہ برآمدات میں 9 ماہ میں 7.7 فیصد کا اضافہ ہوا، درآمدات 11 فیصد بڑھ گئیں، اسی مدت میں برآمدات 24 ارب 66 کروڑ اور درآمدات 43 ارب ڈالرز سے زائد رہیں۔
رپورٹ میں کہا گیا ہے کہ جولائی تا مارچ براہ راست بیرونی سرمایہ کاری 14 فیصد اضافے سے ایک ارب 64 کروڑ 40 لاکھ ڈالرز رہیں، کرنٹ اکاؤنٹ جولائی تا مارچ ایک ارب 85 کروڑ 90 لاکھ ڈالرز سرپلس رہا۔وزارت خزانہ کے مطابق اسٹیٹ بینک کے ذخائر 8 ارب 5 کروڑ ڈالر سے بڑھ کر 10 ارب 57 کروڑ 20 لاکھ ڈالرز ہوگئے، ایف بی آر محصولات میں جولائی تا مارچ 25.9 فیصد کا اضافہ رکارڈ کیا گیا۔
