اسلام آباد: حکومت نے ملک میں ریئل اسٹیٹ سیکٹر کی بہتری کیلئے اقدامات کرتے ہوئے فیڈرل ایکسائز ڈیوٹی ختم کرنے کا فیصلہ کرلیا۔ نیشنل ہائوسنگ پالیسی 2025ء کا ابتدائی مسودہ بھی منظور کرلیا۔جائیداد خریدنے بیچنے والے فائلرز اور نان فائلرز کے حوالے سے جولائی2024ء میں متعارف کروائی گئی 3فیصد فیڈرل ایکسائز ڈیوٹی ختم کرنے کا فیصلہ کرلیا گیا۔
ابتدائی طور پر فائلرز پر 3فیصد اور نان فائلرز پر 5فیصد ڈیوٹی لاگو کی گئی تھی مگر اب دونوں کیٹیگریز سے اسے مکمل طور پر ختم کیا جا رہا ہے۔ماہرین کے مطابق یہ فیصلہ ریئل اسٹیٹ سیکٹر کے لیے ایک بڑا ریلیف ہے۔ پراپرٹی کی قیمتوں میں استحکام،سرمایہ کاری میں اضافہ اور تعمیراتی سرگرمیوں میں تیزی متوقع ہے۔
ملک میں 10ملین ہائوسنگ یونٹس کی کمی سے نمٹنے کیلئے سفارشات بھی مرتب کرلی گئیں، وزارت ہائوسنگ نے نیشنل ہائوسنگ پالیسی کا مسودہ منظور کرلیا۔ اہم مجوزہ اقدامات میں شہری منصوبہ بندی، نئے شہروں کی تعمیر نو، مائیکر و فنانسنگ، مقامی تعمیراتی مواد کا استعمال، زراعت کا تحفظ اور تعمیرات کے شعبے سے جڑی صنعتوں کا فروغ ہے۔
کنسٹرکشن ڈیویلپرز حماد لیاقت چودھری کا کہنا ہے کہ وزیراعظم نے ایک ریئل اسٹیٹ کی ٹاسک فورس بنائی تھی اس کو فوری بحال کیا جائے، اس سے نہ صرف لوکل انڈسٹری چلے گی بلکہ ساتھ ساتھ جو فارن انویسٹمنٹ ہے وہ بھی آئیں گی جو لوکل مینوفیکچر ہے اس کو سپورٹ کیا جائے، جتنی زیادہ انڈسٹریز چلیں گی اس سے نہ صرف روزگار آئے گا ساتھ ساتھ ملکی معیشت بھی بہتر ہوگی۔
ماہرین کے مطابق فیڈرل ایکسائز ڈیوٹی کا خاتمہ ہو یا نیشنل ہائوسنگ پالیسی دوہزار پچیس کی منظوری، شفافیت یقینی بنائی جائے تو دونوں فیصلے پاکستان کے ریئل اسٹیٹ سیکٹر میں ایک نئی جان ڈال سکتے ہیں۔
