اسلام آباد:وفاقی دارالحکومت ، پنجاب اور خیبر پختونخوا کے مختلف شہروں میں زلزلے کے شدید جھٹکے محسوس کیے گئے جس کے باعث شہریوں میں خوف و ہراس پھیل گیا۔
ریکٹر سکیل پر زلزلے کی شدت 5.9 ریکارڈ کی گئی۔رپورٹ کے مطابق اسلام آباد سمیت راولپنڈی،مری ، لاہوراور گردونواح میں زلزلے کے جھٹکے محسوس کیے گئے۔علاوہ ازیں خیبر پختونخوا میں ایبٹ آباد،مانسہرہ ، پشاور، نوشہرہ، لوئر دیر، مالاکنڈ اور گرد و نوح میں بھی زلزلے کے شدید جھٹکے محسوس کیے گئے، اس کے ساتھ آزادکشمیر کے مختلف علاقوں میں بھی زلزلے کے جھٹکے محسوس کیے گئے ۔
زلزلے کے شدید جھٹکے کے باعث شہریوں میں خوف و ہراس پھیل گیا،لوگ استغفار اور کلمہ طیبہ کا ورد کرتے ہوئے گھروں سے باہر نکل آئے۔ادھرلوئر دیر میں میدان خان آباد گورنمنٹ پرائمری سکول کی عمارت شدید متاثر ہوگئی، زلزلے کے شدید جھٹکوں سے سکول کی عمارت میں دراڑیں پڑگئیں۔
زلزلے کا مرکز افغانستان اور تاجکستان کے سرحدی علاقے میں تھا ، زلزلے کی گہرائی 94 کلو میٹر ریکارڈ کی گئی۔
