ملک بھر میں پیٹرول اصل قیمت سے 86روپے لیٹر زیادہ پر فروخت

کراچی:پیٹرولیم مصنوعات پر لیوی بڑھانے سے حکومت ہر ماہ سو ارب روپے کمائے گی، مسلسل بڑھتی لیوی سے صارفین 168 روپے فی لیٹر والا پیٹرول 254.63 میں خریدنے پر مجبور ہو گئے۔
حکومت پیٹرولیم ڈویلپمنٹ لیوی کا ہدف پورا کرنے کے لیے صارفین پر مسلسل بوجھ ڈالنے لگی، عالمی منڈی میں قیمتیں گرنے کے باوجود مصنوعات سستی نہ کرنے سے حکومت کو لیوی کی مد میں سو ارب روپے ماہانہ اضافی آمدن ہو گی۔
فیصلے سے رواں مالی سال کے اختتام تک لیوی کی مد میں ریونیو گیارہ سو ارب ارب روپے ہو جائے گا جبکہ رواں مالی سال کے لیے پیٹرولیم ڈویلپمنٹ لیوی کا مقرر ہدف بارہ سو اکاسی ارب روپے ہے۔یوں صارفین پر مسلسل بوجھ سے حکومت ہدف کے قریب پہنچنے کو ہے۔
ذرائع کا کہنا ہے کہ تیس جون تک حکومت کو لیوی کی مد میں سترہ ارب روپے اضافی ریونیو ملنے کا امکان ہے۔لیوی کی مد میں کمائی کے حکومتی فیصلے سے صارفین 168 روپے فی لیٹر والا پیٹرول254 روپے63 پیسے میں خریدنے پر مجبور ہیں، جس میں اٹھہتر روپے لیوی کی مد میں ادا کیے جا رہے ہیں۔
اس وقت آٹھ روپے2 پیسے اضافے کے بعد حکومت پیٹرول پر فی لیٹر 78 روپے دو پیسے اور ہائی اسپیڈ ڈیزل پر 7 روپے ایک پیسہ اضافے کے بعد 77 روپے ایک پیسہ فی لیٹر لیوی وصول کر رہی ہے۔