پشاور:خیبرپختونخوا حکومت نے اوور سیز پاکستانیوں کے لیے صحت کارڈ پر کام شروع کر دیا ۔
محکمہ صحت کے مطابق حکومت نے اوورسیز ایمپلائمنٹ فائونڈیشن سے اوور سیز پاکستانیوں کا ڈیٹا مانگ لیا۔پہلے مرحلے میں خلیجی ممالک میں اوور سیز پاکستانی صحت کارڈ سے مستفید ہوں گے۔محکمہ صحت کا کہنا ہے کہ ہیلتھ کارڈ کے ذریعے کسی حادثے کی صورت میں متاثرہ خاندان کی مالی معاونت کی جائے گی۔
بیرونِ ملک علاج کے اخراجات کے پیسے حکومت ادا کرے گی جبکہ اخراجات کی ادائیگی صحت کارڈ میں بیماری کے لیے مختص پیسوں کے حساب سے ہو گی۔ مشیرِ صحت خیبر پختون خوا احتشام علی کا کہنا ہے کہ بینکنگ چینلز کے ذریعے پیسے بھجوانے والوں کو ہیلتھ کارڈ کی سہولت فراہم ہو گی۔
پشاورمیں میڈیا سے گفتگو کرتے ہوئے احتشام علی نے کہا کہ بیرونِ ملک علاج کے اخراجات کے بلز حکومت کے پاس جمع کرانے ہوں گے۔ مشیرِ صحت کے پی نے کہا ہے کہ ہیلتھ کارڈ میں بیماریوں کے لیے مختص شدہ رقم ہی ادا کی جائے گی۔انہوں نے کہا کہ خیبر پختون خوا پہلا صوبہ ہو گا جو اوورسیز پاکستانیوں کو یہ سہولت دے گا۔
