اسلام آباد:پاکستان ٹیلی کمیونیکیشن اتھارٹی(پی ٹی اے)نے اعلان کیا ہے کہ ریگولیٹر اس سال اپریل اور مئی کے درمیان 5جی اسپیکٹرم کی نیلامی کرے گا۔
ملائیشیا کے ٹیلی کام حکام کی ایک تقریب سے خطاب کرتے ہوئے چیئرمینن پی ٹی اے میجر جنرل (ر)حفیظ الرحمن نے پاکستان میں 5جی سروسز کے آغاز میں موجودہ تاخیر کا اعتراف کرتے ہوئے کہا کہ پاکستان میں 5جی کی آمد معاشی سرگرمیوں کو مزید فروغ دے گی اور ڈیجیٹل تبدیلی کو آگے بڑھائے گی۔ملائیشیا کے ٹیلی کام کے نمائندوں جن کے ملک میں پہلے ہی 5جی سے 5.5جی میں تبدیل ہو چکی ہے نے ٹیکنالوجی کو لاگو کرنے میں اپنے تجربات شیئر کیے۔
پی ٹی اے کے چیئرمین نے مزید کہا کہ پاکستان 5جی سروسز شروع کرنے میں ملائیشیا کی مہارت سے فائدہ اٹھائے گا۔تقریب سے خطاب کرتے ہوئے وزیر مملکت برائے آئی ٹی اور ٹیلی کام شازہ فاطمہ خواجہ نے کہا کہ پاکستان 5 جی کے آغاز کے قریب پہنچ رہا ہے اور اس حوالے سے منصوبہ بندی اور مشاورت زوروشور کے ساتھ جاری ہے۔
