اسلام آباد:وزیراعظم رمضان پیکیج پر عملدرآمد کی حکمت عملی تیار کرلی گئی جس کے تحت رواں سال 12لاکھ اضافی شہریوں کو پیکیج ملے گا۔
ذرائع کے مطابق پیکیج کے تحت شہریوں کو مختلف اشیا پر10ارب کی سبسڈی دی جائے گی اور مجموعی طور پر ایک کروڑ 60 لاکھ افراد رمضان پیکیج سے مستفید ہوں گے جبکہ بی آئی ایس پی کے رجسٹرڈ ایک کروڑ 50 لاکھ صارفین مستفید ہوں گے۔
10 لاکھ عام شہریوں کورمضان پیکیج کے تحت سستی اشیافراہم کی جائیں گی، گزشتہ سال کی نسبت رواں سال 12 لاکھ اضافی شہریوں کو رمضان پیکیج ملے گا۔
حکومت ملک بھرمیں 800 موبائل یوٹیلٹی اسٹورز قائم کرے گی، پورے ملک میں 300 آٹا سیل پوائنٹس قائم کیے جائیں گے جبکہ موبائل یوٹیلٹی اسٹورز اور آٹا سیل پوائنٹ یکم سے 30 رمضان تک آپریشنل رہیں گے۔
موبائل یوٹیلٹی اسٹورز اور آٹا سیل پوائنٹ کی لوکیشن معلوم کرنے کیلئے موبائل ایپ تیار کرلی گئی ہے ، لوکیشن معلوم کرنے کیلئے صارفین کو موبائل ایپ ڈائون لوڈ کرنا ہوگی، بی آئی ایس پی اور نادرا سے صارفین کی تصدیق کی جائے گی۔
ویئر ہائوسز اور پوائنٹ آف سیل پرمانیٹرنگ کا سخت نظام ہوگا، یوٹیلٹی اسٹورز پر کیمروں کے ذریعے لائیو اسٹریمنگ کا نظام نصب ہو گا، یوٹیلٹی اسٹورزکارپوریشن ہیڈ آفس میں مانیٹرنگ سیل قائم کیا جائے گا۔شہریوں کی شکایات سننے کیلئے 10 ٹول فری فون لائن موجودہوں گی، وزارت صنعت و پیداوار میں بھی مانیٹرنگ سیل قائم ہوگا۔
