شہری کو عمرہ ادائیگی کیلئے جمع گم شدہ رقم مل گئی

کراچی(اسلام ڈیجیٹل) کراچی میں ٹریفک پولیس افسر کی ایمانداری سے عمرہ ادائیگی کے لیے جمع رقم گم ہونے کے بعد بزرگ شہری کو واپس مل گئی۔ٹریفک پولیس سا ئو تھ کے سب انسپکٹر رانا محمد لطیف اور ڈرائیور کانسٹیبل میر زمان کو ڈیفنس خیابان اتحاد کی جانب گزری بخاری لائٹ سگنل پر دوران پیٹرولنگ ایک ہینڈ بیگ ملا جس پر محمد یوسف نام اور موبائل فون لکھا ہوا تھا ۔ٹریفک پولیس افسر نے ملنے والا بیگ کھول کر چیک کیا تو اس میں سے 5لاکھ 15ہزار روپے نقد اور 2پاسپورٹ موجود تھے جس پر انہوں نے رابطہ کیا تو یوسف نامی شہری سے بات ہوئی ،افسرنے شہری کومذکورہ مقام پر بلوا کر ملنے والا بیگ ان کے حوالے کر دیا۔شہری کا کہنا تھا کہ وہ ٹریول ایجنٹ کے پاس عمرے کی ادائیگی کے لیے رقم جمع کرانے جا رہا تھا کہ اس دوران بیگ گر گیا۔بزرگ شہری نے انتہائی خوشی کا اظہار کرتے ہوئے ٹریفک پولیس افسر کی ایمانداری کو سراہتے ہوئے ان کا تہ دل سے شکریہ ادا کیا۔ڈی آئی جی ٹریفک کی جانب سے پولیس افسررانا لطیف اور کانسٹیبل میر زمان کو ایمانداری سے اپنی ڈیوٹی سرانجام دینے پر تعریفی اسناد اور نقد انعام دینے کا اعلان کردیا ۔