راولپنڈی:
نامعلوم لاش ملنے کا معما پولیس نے حل کرلیا، تفتیش میں پتا چلا کہ مقتول قاتل کی بیوی کو میسجز کرتا تھا، جس وجہ سے قتل کیا گیا۔
تھانہ ائرپورٹ پولیس نے 2 ہفتے قبل ملنے والی نامعلوم لاش کے اندھے قتل کا معما حل کرتے ہوئے ملزم کو گرفتار کرلیا۔ مقتول کی شناخت عمر کے نام سے ہوئی ہے جو مالش کرنے کا کام کرتا تھا۔
پولیس کے مطابق مقتول عمر ملزم کی بیوی کو میسج کرتا تھا، جس پر ملزم مظہر نے اپنی بیوی کے ذریعے ملزم کو گھر بلوایا اور قتل کر کے لاش رحیم آباد خالی پلاٹ میں پھینک دی تھی۔ ائرپورٹ پولیس نے ہیومن انٹیلی جینس سمیت تمام ذرائع بروئے کار لاتے ہوئے ملزم کو ٹریس کر کے گرفتار کیا۔
اندھے قتل کو ٹریس کرنے اور ملزم کی گرفتاری پر ایس پی پوٹھوہار ناصر نواز نے ایس ڈی پی او سول لائنز اور ائیرپورٹ پولیس ٹیم کو شاباش دی اور کہا کہ ملزم کو قرار واقعی سزا دلوانے کے لیے تمام قانونی تقاضے پورے کیے جائیں گے۔ ملزم کتنا ہی شاطر کیوں نہ ہو قانون کی گرفت سے نہیں بچ سکتا۔
