لاہور:پی ٹی آئی کے وائس چیئرمین شاہ محمود قریشی نے کہا ہے کہ مزاحمت کے بعد مفاہمت ہی ہوتی ہے، گفتگو سے ہی ملک آگے بڑھ سکتا ہے۔
عدالت میں پیشی کے موقع پر نجی ٹی وی سے گفتگو میں شاہ محمود قریشی کا کہنا تھا کہ بانی پی ٹی آئی نے مذاکرات کا اختیار محمود اچکزئی کو دیا ہے، وہ بہتر فیصلہ کرسکتے ہیں کہ کیا کرنا ہے۔
صحافی کے سوال پر انہوں نے کہا کہ فواد چودھری اور میں ایک پارٹی میں رہے ہیں، میں ہسپتال میں تھا تو وہ عیادت کے لیے آگئے، اب گھر آئے مہمان کو کیا کہوں کہ کیوں ملنے آئے ہو؟۔
شاہ محمود قریشی کا کہنا تھا کہ پاکستان نے افغانستان کی بہت مدد کی ہے، ہمارا افغانستان سے جائز مطالبہ ہے کہ ان کی سرزمین ہمارے خلاف استعمال نہ ہو۔سابق وزیر خارجہ کا کہنا تھا کہ ہم امن چاہتے ہیں، افغانستان کو دہشت گردی کے خلاف ہمارا ساتھ دینا چاہیے۔
پی ٹی آئی کے وائس چیئرمین نے مزید کہا کہ ایران کے بارڈر پر فی الحال صورتحال کنٹرول میں ہے۔ ہم نے بھارت کو جنگ میں ہرایا، اللہ نے ہمیں عزت دی، ابھی تک بھارت سے خطرہ ٹلا نہیں ۔
