محکمہ موسمیات کے مطابق 7 اور 8 ستمبر کو مکمل چاند گرہن ہوگا، جس کا نظارہ پاکستان سمیت دنیا کے کئی خطوں میں کیا جا سکے گا۔
تفصیلات کے مطابق یہ فلکیاتی منظر یورپ، ایشیا، آسٹریلیا، افریقہ، شمالی امریکا کے مغربی حصے اور جنوبی امریکا کے مشرقی حصے میں دیکھا جا سکے گا۔ اس کے علاوہ بحرالکاہل، بحرِ ہند، بحرِ اوقیانوس، آرکٹک اور انٹارکٹیکا سے بھی اس گرہن کا مشاہدہ ممکن ہوگا۔
پاکستانی وقت کے مطابق 7 ستمبر کی رات 8 بجکر 28 منٹ پر چاند کی روشنی مدہم ہونا شروع ہوگی، جبکہ 9 بجکر 27 منٹ پر جزوی گرہن کا آغاز ہوگا۔ مکمل گرہن رات 10 بجکر 31 منٹ پر شروع ہوگا اور 11 بجکر 12 منٹ پر اپنے عروج پر ہوگا۔
محکمہ موسمیات کے مطابق مکمل گرہن 11 بجکر 53 منٹ پر ختم ہوگا، جزوی گرہن 12 بجکر 57 منٹ پر اختتام کو پہنچے گا جبکہ پورا عمل 8 ستمبر کو رات 1 بجکر 55 منٹ پر مکمل ہوگا۔
