مکہ مکرمہ:سعودی عرب کے ادارہ امن عامہ نے 23اپریل سے مکہ شہر جانے والوں کے لیے پرمٹ لازمی قرار دے دیا ، چیک پوسٹوں پر متعین اہلکاروں کو پرمٹ چیک کرنے کی ہدایت کر دی گئی ہے۔
سعودی اخبارکے مطابق ادارہ امن عامہ کی جانب سے جاری تفصیلی بیان میں کہا گیا ہے کہ 25شوال 1446ہجری بمطابق 23اپریل 2025ء سے مکہ شہر جانے والے تمام راستوں پر موجود چیک پوسٹوں کے ذمہ داروں کو مطلع کر دیا گیا ہے کہ مکہ پرمٹ کے بغیر کسی کو جانے کی اجازت نہیں ہو گی۔
حج امور کے تحت مذکورہ تاریخ سے ان تمام غیرملکی کارکنوں کو جن کے پاس مکہ یا مشاعر مقدسہ میں داخلہ پرمٹ نہیں ہوں گے یا ایسے غیرملکی جن کے اقامے مکہ سے جاری نہیں یا حج پرمٹ نہ رکھنے والے افراد کو ضوابط کے مطابق چیک پوسٹ سے لوٹا دیا جائے گا۔
ادارہ امن عامہ کا مزید کہنا ہے کہ حج ضوابط کے تحت پرمٹ کا اجرا متحدہ پورٹل منصہ تصریح کے ذریعے کیا جا رہا ہے جو ابشر یا مقیم پورٹل سے لنک ہے۔پورٹل سے مقررہ ضوابط کے مطابق مکہ پرمٹ حاصل کرنے کے بعد ہی شہر میں داخلے کی اجازت ہو گی۔
سعودی عرب کے مشرقی علاقے کے بلدیہ کے ترجمان فیصل الزھرانی نے کہا ہے کہ شاہراہوں اور اہم مقامات پر اسمارٹ شہروں کے تقاضے کو پورا کرتے ہوئے 4ہزار سی سی ٹی وی کیمرے نصب کیے جائیں گے۔سعودی ٹی وی سے گفتگو کرتے ہوئے الزھرانی نے بتایا کہ ترقیاتی منصوبے کے مطابق دمام اور البیضا کمشنری کے مختلف مقامات پر اسمارٹ کیمروں کی تنصیب کا کام جاری ہے۔
پہلے مرحلے میں 50فیصد کام مکمل کرلیا گیا ہے جس کے تحت دمام شہر میں دو ہزار اسمارٹ کیمرے نصب کیے جاچکے ہیں۔دوسرے مرحلے کے تحت باقی 50فیصد کام الخبر، ظھران اور البیضا کمشنری میں جاری ہے جس میں مزید 2ہزار اسمارٹ سی سی ٹی وی کیمروں کی تنصیب کی جائے گی۔
