ہمارے احتجاج کو غلط سمجھا جاتا ہے، ہم کہاں جائیں؟ایم کیوایم کا حکومت سے سوال

کراچی:ایم کیو ایم پاکستان کے چیئرمین خالد مقبول صدیقی نے کہا ہے کہ عدالتیں ہمیں بتائیں کہ ہمیں انصاف کہاں سے ملے گا؟۔

انہوں نے مزید کہاکہ حکمران بتائیں، ریاست بتائے، وزیر اعظم، صدر بتائیں ہم کہاں جائیں، ہمارے احتجاج کو ہمیشہ غلط سمجھا جاتا ہے۔حادثات میں جاں بحق افراد کیلئے پٹیشن دائر کرنے جارہے ہیں۔

کراچی میں نیوز کانفرنس سے خطاب کرتے ہوئے انہوں نے کہا کہ عید سے قبل کراچی والوں کو سوگ میں ڈال دیا گیا، کراچی والوں کے خون سے پورے رمضان سڑکیں لہولہان ہوتی رہی ہیں، سینکڑوں نوجوان ڈاکوؤں کے ہاتھوں مارے گئے۔

ان کا کہنا تھا کہ کراچی کا کونہ کونہ 17 سالوں کا اپنا نوحہ سناتا ہے، منی بسیں ماضی میں عوام کو نشانہ بناتی تھیں،ڈمپر سے ہلاکتیں تسلسل سے کیا پیغام دیا جارہا ہے؟ایک سسٹم ڈمپر مافیا کو سپورٹ کرتا ہے، چیف جسٹس کو خط لکھا ہے مطالبہ کیا ہے کہ اس پر سپریم کورٹ سوموٹو لے۔خالد مقبول نے کہا کہ عدالتیں ہمیں بتائے کہ ہمیں انصاف کہاں سے ملے گا۔