نگراں پنجاب حکومت نے 25 مئی کو تحریک انصاف کے لانگ مارچ کے موقع پر مبینہ پولیس تشدد کے واقعات کی تحقیقات کیلئے قائم ٹربیونل کو تحلیل کر دیا۔
نگران صوبائی کابینہ نے ٹربیونل کی جانب سے کارروائیوں کی تمام سفارشات مسترد کردیں۔ نگران کابینہ نے ڈی ایس پی ناصر مشتاق اور ایس ایچ او فرقان محمود کیخلاف کارروائی کی مںظوری جبکہ باقی پولیس افسران اور اہلکاروں کو کلئیر کردیا گیا۔
دستاویزات کے مطابق 25 مئی کے واقعات پر افسران کے خلاف آرٹیکل 6کے تحت کارروائی کی ضرورت نہیں ہے۔ یاد رہے کہ تحریک انصاف کی ریلی پر تشدد، توڑ پھوڑ پر ایک رکنی انکوائری ٹربیونل تشکیل دیا گیا تھا۔
خیال رہے کہ 28 ستمبر کو اس وقت کے وزیراعلیٰ پنجاب چوہدری پرویزالہیٰ کی ہدایت پر مئی کو آزادی مارچ کے دوران پیش آنے والے واقعات کی تحقیقات کے لئے ون مین ٹربیونل قائم کیا گیا تھا۔
اعلامیے کے مطابق ون مین ٹریبونل نے 25مئی کو ہونے والے واقعات کے حقائق اور وجوہات کا تعین اور اقدامات کاجائزہ لے کر ذمہ داری کا تعین کرنا تھا۔