کوئٹہ:وزیراعظم نے کراچی تا چمن شاہراہ کا سنگ بنیاد رکھ دیا جو دوسال میں مکمل ہوجائے گی۔وزیراعظم شہباز شریف نے کہا ہے کہ دہشت گردوں نے خیبرپختونخوا کی طرح بلوچستان میں بھی مشکلات پیدا کیں، ہم دہشت گردی کے خاتمے تک چین سے نہیں بیٹھیں گے۔
کوئٹہ کے ایک روزہ دورے کے دوران وزیر اعظم میاں محمد شہباز شریف سے صوبائی وزراء اراکین قومی و صوبائی اسمبلی ،اتحادی جماعتوں اور اپوزیشن اراکین نے ملاقات کی، ملاقات میں سیا سی امور، گڈگورننس اور عوامی خدمات کی فراہمی کے لئے اٹھائے گئے اقدامات بارے تفصیلی تبادلہ خیال کیا گیا۔
اس موقع پر گفتگوکرتے ہوئے انہوں نے کہا کہ فتنہ الخوارج کو ہمسایہ ممالک سے مکمل سپورٹ دی جارہی ہے، فیلڈ مارشل دہشت گردی کے خلاف جنگ میں فوج کی قیادت کررہے ہیں۔
انہوں نے کہا کہ این ایف سی کے تحت صوبوں کو وسائل فراہم کیے جارہے ہیں، اْس وقت کے وزیراعلیٰ بلوچستان اسلم رئیسانی نے این ایف سی میں 100 فیصد اضافے کا مطالبہ کیا تھا جس پر پنجاب نے اسے لیڈ کیا، پنجاب اپنے حصے کے 11 ارب روپے بلوچستان کو دیتا ہے۔
نوازشریف نے بلوچستان میں سڑکوں کے جال بچھائے، بلوچستان میں ترقیاتی کام کوئی احسان نہیں ہمارا فرض ہے، مشاورت اور بھائی چارے کے ساتھ آگے بڑھیں گے۔وزیراعظم کا کہنا تھا کہ جو چیلنجز ہیں ان کا سرجوڑ کر حل تلاش کرنا ہے۔
بعدازاں انہوںنے کوئٹہ میں ایک تقریب میں کراچی تا چمن چار رویہ سڑک کا سنگ بنیاد رکھ دیا۔ یہ شاہراہ دو برس میں مکمل ہوگی۔ اس موقع پر اسحاق ڈار، علیم خان، گورنر اور وزیراعلیٰ بلوچستان اور دیگر حکام بھی موجود تھے۔
تقریب سے خطاب میں وزیراعظم نے کہا کہ شاہراہ کی تعمیر میں معیار پر کوئی سمجھوتہ نہ کیا جائے اور اسے مقررہ وقت دسمبر 2027ء سے پہلے مکمل کرلیا جائے۔ پیٹرولیم مصنوعات کی قیمتیں کم ہوئیں تو منافع اس منصوبے کے لیے رکھا۔
انہوں نے کہا کہ بلوچستان کی ترقی پاکستان کی ترقی ہے صوبے کی ترقی کے لیے ہر ممکن وسائل فراہم کریں گے، غیور بلوچ اور پشتون قوم نے تحریک پاکستان میں ساتھ دیا، چاروں صوبوں کو ترقی کا مساوی حق حاصل ہے۔
ان کا کہنا تھا کہ پاکستان کا امن تباہ کرنے میں پڑوسی ممالک کا ہاتھ ہے، ہماری فوج اور سیکورٹی ادارے دہشت گردی کا سر کچل کر رہیں گے،پاکستان کا امن تباہ کرنے والوں کو مئی میں بڑا جواب ملا، ہمسایہ ممالک پاکستان میں دہشت گردی کو بڑھانے کے لیے فنڈنگ کرتے ہیں۔
انہوں نے کہا کہ بلوچستان میں دانش اسکول کا منصوبہ شروع کررہے ہیں، بلوچستان میں 5 دانش اسکول بنانے جارہے ہیں۔ وزیراعظم نے چیف آف بگٹی قبائل منتخب ہونے پر سرفراز بگٹی کو مبارکباد دی اور کہا کہ چیلنجز کے باوجود سیاسی قیادت عوام کی خدمت میں مصروف ہے، کابینہ ارکان اور سیاسی قیادت مبارکباد کی مستحق ہے۔
اس سے قبل وزیراعظم شہبازشریف نے امن وامان سے متعلق اجلاس کی صدارت بھی کی، اجلاس میں وزیراعلیٰ سرفرازبگٹی نے سیکورٹی صورت حال اور بلوچستان میں جاری منصوبوں پر تفصیلی بریفنگ دی۔
