کراچی: شہر قائد میں کل سے 4 روز کے لیے پانی کی فراہمی معطل کرنے کا اعلان کردیا گیا جس سے مختلف علاقے متاثر ہوں گے۔
ڈبلیو ای ایس ایس آئی پی کے تحت اولڈ پپری مین پر بچھائی گئی نئی لائن کو موجودہ واٹر نیٹ ورک سے منسلک کرنے کا کام کل سے شروع ہوگا۔منصوبے پر جاری کام 13 جنوری بروز منگل تک مکمل کر لیا جائے گا۔
منصوبے کی تکمیل کے لیے اولڈ پپری پمپنگ سٹیشن کو 96 گھنٹے کے لیے بند رکھا جائے گا، جس کے باعث پمپنگ سٹیشن سے شہر کو پانی کی فراہمی عارضی طور پر معطل رہے گی۔
اس دوران ملیر، شاہ فیصل اور ماڈل زون ٹاؤن کے بعض علاقوں میں پانی کی فراہمی متاثر ہوگی۔کام کے دوران لانڈھی اور شیرپاؤ میں ہائیڈرنٹس بھی بند رہیں گے اور لائن کو فعال کرنے کے لیے موجودہ نظام سے منسلک کرنے کے ساتھ جدید والوز نصب کیے جائیں گے۔
پرانی پپری پمپنگ سٹیشن کی بندش کے باعث شہر کو یومیہ تقریباً 60 ملین گیلن پانی کی عارضی کمی کا سامنا کرنا پڑے گا۔ مینٹیننس کے باعث مجموعی فراہمی میں عارضی کمی کے باوجود شہر کو یومیہ تقریباً 590 ملین گیلن پانی کی فراہمی جاری رکھی جائے گی۔
