قومی معاملات پر ساتھ دیں، وزیر اعظم اور فیلڈ مارشل کا علماء سے خطاب

اسلام آباد:اسلام آباد کنونشن سینٹر میں قومی علماء و مشائخ کانفرنس کا انعقاد، 2500سے زاید علماء کرام اور مشائخ عظام کی شرکت، وزیر اعظم شہباز شریف اور فیلڈ مارشل چیف آف ڈیفنس فورسز جنرل عاصم منیر کا کہنا تھا کہ قومی معاملات پر پوری قوم کو یک جان دو قالب ہونے کی ضرورت ہے جس کے لیے علماء کرام کو کردار ادا کرنا ہوگا۔
میڈیا رپورٹوں کے مطابق وفاقی دارالحکومت میں قومی علما کنونشن سے خطاب کرتے ہوئے وزیر اعظم شہباز شریف نے کہا کہ معرکہ حق میں علما اور قوم کی دعاؤں سے پاکستان کو اہم کامیابی ملی، مسلح افواج کی جرات سے بھارت کو شرم ناک شکست ہوئی، فیلڈ مارشل عاصم منیر کی قیادت میں فوج نے بھارت کو منہ توڑ جواب دیا۔دشمن حیران اور دوست خوش ہیں کہ پاکستان نے نہ صرف دشمن کے خلاف معرکہ جیتا بلکہ دوست ممالک اسے اپنی فتح سمجھتے ہیں، ان کے دل باغ باغ ہیں، وہ ہمیں مبارک باد دیتے ہیں، افواج کے ہر سپاہی کی معرکہ حق میں بے مثال کاوشیں شامل ہیں۔
انہوں نے کہا کہ فیلڈ مارشل عاصم منیر نے بھارت کے خلاف جنگ کو جرات سے لیڈ کیا، لیکن آج اس عظیم فوج کے خلاف زہریلا پروپیگنڈا کیا جارہا ہے۔ افواج کے جوانوں نے اپنے بچے یتیم کر کے کروڑوں بچوں کو یتیم ہونے سے بچایا۔افواج کی قربانیوں کا مذاق اڑائیں گے تو کون پاکستان کی عزت کریگا؟افواج پاکستان کے خلاف زہر آلود پراپیگنڈا کیا جائے تو فوج کا دفاع کرنا حکومت اور علما کرام سمیت سب کی ذمہ داری ہے۔
وزیر اعظم کا کہنا تھا کہ ملک کو دیوالیہ ہونے سے بچانے کے لیے سیاسی وعسکری قیادت نے کردار ادا کیا، پاکستان کو معاشی ترقی کی طرف لے جانے کے لیے سرتوڑ کوششیں کررہے ہیں مگر دہشت گردی اور یہ کوششیں ساتھ ساتھ نہیں چل سکتے، اِس ملک کو ترقی دینے کے لیے دہشت گردی کا خاتمہ ضروری ہے۔
انہوں نے کہا کہ فرقہ واریت کا خاتمہ ضروری ہے اس کے لیے علما اپنا کردار ادا کریں، اب بھی کچھ علما ایسے ہیں جو تفریق کی بات کرتے ہیں،بعض مکاتب فکر کے لوگ کہتے ہیں اس مسجد میں اس کے پیچھے نماز نہیں پڑھ سکتے،یہ رویہ روکنا ہوگا۔
وزیراعظم کا کہنا تھا کہ افغانستان سے لوگ یہاں آکر دہشت گردی کرتے ہیں اور ہمارے لوگ شہید ہورہے ہیں، بلوچستان اور کے پی میں بے گناہ لوگ خوارج کا نشانہ بن رہے ہیں، شہداء کی قربانیاں رائیگاں نہیں جائیں گی۔
انہوں نے کہا کہ نہ جادو ٹونے سے اور نہ کسی اور طریقے سے صرف شب و روز محنت سے ملک ترقی کرے گا، ہم بھرپور ترقی اور خوشحالی کے سفر کی جانب گامزن ہیں۔دن رات کام کر کے محنت کر کے قرض چکائیں گے اپنی دولت خود پیدا کرینگے۔
قبل ازیں اپنے خطا ب میں چیف آف ڈیفنس فورسز فیلڈ مارشل عاصم منیر نے کہا کہ علما ء قوم کو متحد رکھیں اور قوم کی نظر میں وسعت پیدا کریں۔ ریاست طیبہ اور ریاست پاکستان کا آپس میں گہرا تعلق ہے، سعودی عرب کے ساتھ دفاعی معاہدہ تاریخی ہے، اللہ نے تمام مسلم ممالک میں سے محافظین حرمین کا شرف پاکستان کو عطا کیا۔
انہوں نے کہا کہ جس قوم نے علم اور قلم کو چھوڑا تو انتشار اور فساد الارض نے وہاں جگہ لی، عزت اور طاقت تقسیم سے نہیں محنت اور علم سے حاصل ہوتی ہے۔
چیف آف ڈیفنس فورسز نے مزید کہا کہ دہشتگردی پاکستان کا نہیں ہندوستان کا وتیرہ ہے، ہم دشمن کو چھپ کر نہیں للکار کر مارتے ہیں، اسلامی ریاست میں ریاست کے سوا کوئی جہاد کا حکم نہیں دے سکتا، معرکہ حق میں اللہ کی نصرت سے کامیابی ملی۔