ماسکو: (ویب ڈیسک) روس نے سنیپ چیٹ اور ایپل کی ویڈیو کالنگ سروس پر پابندی عائد کر دی ہے۔
عالمی میڈیا رپورٹس کے مطابق حکام کا کہنا ہے کہ یہ پلیٹ فارمز مبینہ طور پر دہشت گردانہ سرگرمیوں کی منصوبہ بندی کے لیے استعمال کیے جا رہے تھے۔ حکام کے مطابق کچھ گروہوں نے سنیپ چیٹ کی خفیہ چیٹس اور خودکار طور پر غائب ہونے والے میسجز کا فائدہ اٹھا کر رابطے برقرار رکھے، جس کے بعد اسے ملک میں بلاک کر دیا گیا۔
اسی طرح روس نے ایپل کی ویڈیو کالنگ سروس FaceTime کو بھی غیر فعال کر دیا ہے۔ حکام کے مطابق بعض غیر منظور شدہ بیرونی کمیونی کیشن سروسز سکیورٹی ایجنسیوں کے نگرانی نظام سے ہم آہنگ نہیں، جس پر یہ اقدام اٹھایا گیا۔
واضح رہے کہ اس سے قبل روس گوگل، یوٹیوب، میٹا کی مختلف سروسز، واٹس ایپ اور ٹیلیگرام سمیت کئی بین الاقوامی ڈیجیٹل پلیٹ فارمز پر بھی پابندیاں لگا چکا ہے۔ تجزیہ کاروں کا کہنا ہے کہ ان اقدامات سے عام صارفین کی عالمی پلیٹ فارمز تک رسائی مزید محدود ہوگئی ہے، جبکہ حکومت کا موقف ہے کہ قومی سلامتی کے لیے یہ فیصلے ضروری ہیں۔
