راولپنڈی:فیلڈ مارشل سید عاصم منیر سے سعودی مسلح افواج کے چیف آف جنرل اسٹاف جنرل فیاض بن حمید الرویلی نے ملاقات کی جس میں دونوں ممالک کے درمیان دیرینہ اور اسٹریٹجک فوجی تعاون کو مضبوط بنانے پر اتفاق کیا گیا۔
آئی ایس پی آر کے مطابق جنرل فیاض بن حمید الرویلی نے جنرل ہیڈکوارٹرز راولپنڈی کا دورہ کیا،سعودی مسلح افواج کے چیف آف جنرل اسٹاف نے فیلڈ مارشل عاصم منیر سے ملاقات بھی کی۔معزز مہمان نے سعودی مسلح افواج کے ساتھ متعدد شعبوں میں پاکستان کے تعاون کو سراہا۔
سعودی جنرل نے تعاون کے مضبوط رشتوں کو مزید آگے بڑھانے کے عزم کا اعادہ کیا۔جنرل فیاض بن حمید الرویلی نے جی ایچ کیو میں یادگار شہدا پر پھولوں کی چادر چڑھائی جبکہ پاک فوج کے چاق و چوبند دستے نے معزز مہمان کو گارڈ آف آنر پیش کیا۔
