حیدر آباد:حیدرآباد کے علاقے لطیف آباد نمبر 10 میں واقع غیر قانونی آتش بازی کا سامان بنانے والے کارخانے میں دھماکے کے بعد آگ لگ گئی جس کے نتیجے میں 5 مزدور جاں بحق جبکہ متعدد زخمی ہو گئے ہیں۔
نجی ٹی وی کے مطابق لطیف آباد یونٹ نمبر 10 لغاری گوٹھ کے رہائشی علاقے میں واقع غیر قانونی آتش بازی کا سامان بنانے والے کارخانے میں دھماکے کے بعد پورا علاقہ لرزا اٹھا،دھماکے کے بعد کارخانے میں آگ لگ گئی، اطلاع ملتے ہی فائر بریگیڈ کی گاڑیاں آگ بھجانے پہنچ گئیں۔
دھماکوں اور آگ لگنے سے 5 مزدور جاں بحق جبکہ متعددزخمی ہو گئے، جاں بحق افراد کی لاشوں اور زخمی مزدوروں کو مقامی ہسپتال منتقل کر دیا گیا۔
دریں اثنا، وزیراعلیٰ سندھ مراد علی شاہ نے حیدرآباد فیکٹری دھماکے کا نوٹس لیتے ہوئے زخمی مزدوروں کو فوری اور بہترین طبی امداد فراہم کرنے کی ہدایت کی ہے ساتھ ہی انہوں نے واقعے کی فوری رپورٹ بھی طلب کر لی۔
مراد علی شاہ نے کمشنر و ڈی سی حیدرآباد سے فوری حقائق نامہ طلب کیا اور فیکٹری میں حفاظتی انتظامات کا مکمل آڈٹ کرنے کا حکم بھی دیا۔انہوں نے کہا کہ دھماکے کے ذمہ داروں کے خلاف سخت کارروائی کی جائے گی، مزدوروں کے تحفظ میں کوتاہی برداشت نہیں کریں گے۔
