راولپنڈی:عمران خان سے ملاقات کی اجازت نہ ملنے پر وزیراعلیٰ خیبر پختونخوا سہیل آفریدی نے اڈیالہ روڈ پر دھرنا دیدیا۔سہیل آفریدی کارکنوں کے ساتھ اڈیالہ روڈ پر بیٹھ گئے جس کے باعث اڈیالہ روڈ پر ٹریفک مکمل جام ہوگیا۔
صورتحال کے باعث سہیل آفریدی کا سیکورٹی اسٹاف اور راولپنڈی پولیس بھی الرٹ رہیں جب کہ ٹریفک جام میں پھنسے عوام کو مشکلات کا سامنا پڑا۔وزیراعلیٰ کے پی کے اڈیالہ روڈ پر دھرنے کے دوران پی ٹی آئی کارکنان نے نعرے بازی کی۔
بعد ازاں وزیراعلیٰ کے پی نے دھرنا ختم کردیا اور کارکنوں سمیت اڈیالہ روڈ سے اٹھ کر سائیڈ پر چلے گئے جس کے بعد راولپنڈی پولیس نے اڈیالہ روڈ پر ٹریفک بحال کردی۔
وزیر اعلیٰ خیبر پختونخوا سہیل آفریدی نے دھرنے کے بعد میڈیا سے گفتگو کرتے ہوئے کہا کہ عدالتی احکامات کے باوجود ہمیں آج اپنے لیڈر سے ملنے نہیں دیا گیا، یہ ہماری عدلیہ کی بے بسی ہے، ججز اپنے احکامات نہیں منوا پارہے، سوچنا پڑے گا ملک کس طرف جارہا ہے۔
ان کا کہنا تھا کہ جب سے وزیر اعلیٰ بنا ہوں مجھے ٹارگٹ کیا جارہا ہے۔میں نے اپنے لیڈر سے رہنمائی لینی ہے اس لئے ملاقات کرنا ضروری ہے، میں نے وفاقی اور پنجاب حکومت کو ملاقات کیلئے لکھا ہے، ہم عدالتوں میں بھی گئے لیکن کوئی نہیں سن رہامیں اب عوام کی عدالت میں جاؤنگا۔
بحیثیت وزیر اعلیٰ میرا کام ہے اپنی عوام کیلئے کام کرنا، جلسے جلوس کرنا پارٹی کا کام ہے، پارٹی کی طرف سے جو بھی ہدایات آئینگی اس پر عمل کرونگا۔حکمت عملی ایک ہی ہے بانی پی ٹی آئی کی اجازت کے بغیر کابینہ تشکیل نہیں پائے گی، بانی پی ٹی آئی ہمارے دلوں میں ہیں، میرا لائحہ عمل وہی ہے جو بانی پی ٹی آئی کا لائحہ عمل ہے، ہم عزت اور وقار کے ساتھ افغان بھائیوں کو واپس بھیجیں گے۔
