لاہور:لاہور پولیس کی جانب سے رواں سال گداگری ایکٹ کے تحت کارروائیوں کے نتیجے میں2ہزار747پیشہ ور گداگروں کی گرفتاری عمل میں لاکر ان کے خلاف شہر کے مختلف تھانوں میں مقدمات کا اندراج کیا گیا۔
ترجمان لاہور پولیس نے بتایاکہ گرفتارگداگروں میں2ہزار632مرد، 103عورتیں اور 12سہولت کار شامل ہیں۔سی سی پی او بلال صدیق کمیانہ نے کہا ہے کہ انسدادِ گداگری مہم کے تحت کارروائیاں جاری ہیں۔
سی سی پی او لاہور نے ڈویژنل افسران کو مؤثر حکمت ِ عملی کے تحت گداگر وں کے خلاف کارروائیوں میں تیزی لانے کی ہدایات جاری کرتے ہوئے کہا کہ ٹریفک سگنلز، چوکوں اوراہم شاہراہوں پر بھکاریوں کو کھڑا نہ ہونے دیا جائے۔
انہوں نے کہا کہ بھیک مانگنے والے بچوں کو چائلڈ پروٹیکشن بیورو کے حوالے کیا جائے۔بلال صدیق کمیانہ نے کہا کہ گداگروں کے ہینڈلرز کے گرد گھیرا تنگ کیا جائے۔
