وزیراعظم پاکستان کی خصوصی ہدایات پر غزہ کے محصور اور متاثرہ عوام کے لیے پاکستان کی جانب سے امداد کا سلسلہ جاری ہے۔ اس انسانی ہمدردی کے مشن کے تحت حالیہ مرحلے میں مزید 412 ٹن امدادی سامان پانچ خصوصی پروازوں کے ذریعے روانہ کیا گیا ہے، جس میں خوراک، ضروری اشیائے خورونوش اور دیگر امدادی سامان شامل ہے۔
علامہ اقبال انٹرنیشنل ایئرپورٹ لاہور سے 100 ٹن امدادی سامان پر مشتمل 21ویں کھیپ خصوصی پرواز کے ذریعے روانہ کی گئی۔ اس سے قبل 23 اگست کو 100 ٹن امدادی سامان پر مشتمل 19ویں کھیپ لاہور سے، جبکہ 12 ٹن سامان پر مشتمل چوتھی کھیپ اسلام آباد سے روانہ کی گئی تھی۔21ویں کھیپ میں راشن بیگز، تیار کھانا اور ڈبہ بند فروٹ شامل ہے۔
این ڈی ایم اے کے اعداد و شمار کے مطابق اب تک بھیجی گئی 21 امدادی کھیپوں کا مجموعی وزن 2027 ٹن ہو چکا ہے۔امدادی سامان کی روانگی کے موقع پر منعقدہ تقریب میں وفاقی وزیر چوہدری سالک حسین نے بطور مہمانِ خصوصی شرکت کی۔ اس موقع پر حکومتی نمائندے، این ڈی ایم اے اور دیگر فلاحی اداروں کے اعلیٰ افسران بھی موجود تھے۔
وفاقی وزیر نے این ڈی ایم اے اور تمام فلاحی اداروں کی خدمات کو سراہتے ہوئے کہا کہ پاکستان ہر حال میں فلسطینی عوام کے ساتھ کھڑا ہے اور ان کی ضروریات کو پورا کرنے کی ہر ممکن کوشش جاری رکھے گا۔ اس موقع پر چوہدری سالک حسین نے کہا یہ امدادی کوشش پاکستان کے اس عزم کا مظہر ہیں کہ ہم غزہ کے مظلوم عوام کو تنہا نہیں چھوڑیں گے۔
