ڈھاکہ:وفاقی وزیر داخلہ محسن نقوی کی بنگلا دیشی ہم منصب لیفٹیننٹ جنرل (ر)جہانگیر عالم چودھری سے ملاقات میں سفارتی و سرکاری پاسپورٹس کو ویزا فری انٹری کی سہولت دینے کا فیصلہ کرلیا گیا۔
اسلام آباد میں وزارتِ داخلہ سے جاری بیان کے مطابق وزیر داخلہ محسن نقوی کا وزارت داخلہ آمد پر بنگلا دیشی ہم منصب نے پرتپاک خیرمقدم کیا۔ملاقات میں باہمی دلچسپی کے امور اور پاکستان بنگلا دیش دوطرفہ تعلقات پر تبادلہ خیال کیا گیا۔
دونوں ملکوں نے سفارتی و سرکاری پاسپورٹس کو ویزا فری انٹری کی سہولت دینے کا اصولی فیصلہ کیا ہے۔ وفاقی وزیر داخلہ محسن نقوی کو وزارت داخلہ آمد پر پرتپاک استقبال کیا گیا اور گارڈ آف آنرز پیش کیا گیا۔ ملاقات کے دوران دونوں ممالک کے درمیان داخلی سلامتی، پولیس ٹریننگ، انسداد دہشت گردی، منشیات اور انسانی سمگلنگ کے خلاف تعاون پر بھی مفصل تبادلہ خیال ہوا۔
دونوں وزرائے داخلہ نے اس بات پر اتفاق کیا کہ پولیس اکیڈمیز کے درمیان ٹریننگ پروگرامز کا تبادلہ بڑھایا جائے گا جبکہ انسداد دہشت گردی کے لیے مشترکہ اقدامات کو مزید مؤثر بنایا جائے گا۔ بنگلا دیشی وزیر داخلہ نے وزیر داخلہ محسن نقوی کی جانب سے پولیس ٹریننگ کی پیشکش پر شکریہ ادا کیا اور کہا کہ آپ کا دورہ پاک بنگلہ تعلقات کے فروغ میں سنگ میل ثابت ہوگا۔
دونوں ممالک نے دوطرفہ تعاون کو مؤثر اور پائیدار بنانے کے لیے ایک مشترکہ کمیٹی تشکیل دینے کا فیصلہ بھی کیا ہے جس کی سربراہی پاکستان کی جانب سے وفاقی سیکرٹری داخلہ خرم آغا کریں گے۔
اس موقع پر بنگلا دیش کے وزیر مملکت برائے داخلہ خدا بخش، سیکرٹری داخلہ نسیم الغنی، ایڈیشنل سیکرٹری سیکورٹی ڈویژن شمیم خان، پاکستانی ہائی کمیشن کے ناظم الامور محمد واصف، پولیٹیکل قونصلر کامران دونگل سمیت اعلیٰ حکام بھی موجود تھے۔
