اسلام آباد/راولپنڈی:اسلام آباد اورراولپنڈی میں موسلادھار بارش،سیدپور ویلج میں برساتی نالے بپھر گئے جس میں گاڑیاں بھی بہنے لگیں۔برساتی نالوں کا پانی پلوں کے اوپر سے بہنے لگا۔سیدپور ولیج میں ترقیاتی کام کے دوران دیوار گر گئی، دیوار گرنے سے گھروں کو بھی نقصان ہوا۔
نالہ بپھرنے کے باعث بارش کا پانی گھروں میں داخل ہوگیا۔پانی گھروں اور گلیوں میں جمع ہونے سے شہریوں کو مشکلات کا سامنا ہے جب کہ مقامی افراد نے امداد کی اپیل کی۔اہل علاقہ نے متعلقہ اداروں سے فوری کارروائی کا مطالبہ کیا جب کہ انتظامیہ کی جانب سے نقصانات کا جائزہ لینے کی یقین دہانی کرائی گئی۔
ایم ڈی واسا نے کہا ہے کہ جڑواں شہروں راولپنڈی اور اسلام آباد میں موسلادھار بارش کے بعد رین ایمرجنسی نافذ کردی گئی ہے۔ایم ڈی واسا نے بتایا کہ سیدپور کے مقام پر سب سے زیادہ 124 ملی میٹر بارش ریکارڈ کی گئی۔
ایم ڈی واسا نے بتایا کہ گولڑہ 46 ملی میٹر، پی ایم ڈی کے مقام پر16 ملی میٹربارش ریکارڈ کی گئی، نشیبی علاقوں میں عملہ ہیوی مشینری کے ساتھ تعینات ہے۔واسا کا کہنا ہے کہ نالہ لئی کی نگرانی جاری ہے، نالہ لئی میں کٹاریاں کے مقام پر 10 فٹ اور گوالمنڈی پل پر پانی کا لیول 5 فٹ ہے۔
