کابل/اسلام آباد:وفاقی وزیر داخلہ محسن نقوی کی کابل میں اپنے افغان ہم منصب سراج الدین حقانی سے اہم ملاقات ہوئی جس میں دوطرفہ تعلقات کے حوالے سے تبادلہ خیال کیا گیا۔وزیرداخلہ محسن نقوی کا افغان وزارت داخلہ آمد پر افغان وزیر داخلہ سراج الدین حقانی نے خیر مقدم کیا۔
ملاقات میں دوطرفہ تعلقات خصوصاً انسداد دہشت گردی، دراندازی اور کالعدم تحریک طالبان کے حوالے سے تبادلہ خیال کیا گیا۔ملاقات میں پاک افغان سرحد کی مؤثر مینجمنٹ، منشیات کی روک تھام اور سرحد پار نقل و حرکت کو منظم کرنے کے طریقہ کار پر بھی بات چیت ہوئی۔
دونوں رہنماؤں کے درمیان پاکستان میں غیر قانونی طور پر مقیم افغان شہریوں کی وطن واپسی کے عمل پر بھی گفتگو ہوئی۔دونوں وزرائے داخلہ نے دہشت گردی کے فتنہ کے خاتمہ کیلئے باہمی تعاون کو مضبوط بنانے پر اتفاق کیا۔
اس موقع پروزیر داخلہ محسن نقوی نے کہا کہ دہشت گرد تنظیمیں فساد اور عدم استحکام کا باعث بن رہی ہیں ملکر روکنا ہو گا، پاکستان افغانستان کے ساتھ برادرانہ اور دیرپا تعلقات کا خواہاں ہے۔
پاکستان نے کئی دہائیوں تک لاکھوں افغان مہاجرین کی بے لوث مہمان نوازی کی، شہریوں کی قانونی طور پر آمد کے دروازے کھلے ہیں۔ملاقات میںافغانستان کے سینئر نائب وزیرداخلہ ابراہیم سردار، پاکستان کے نمائندہ خصوصی برائے افغانستان محمد صادق، وفاقی سیکرٹری داخلہ خرم آغا، اعلیٰ سفارتی حکام اور افغان وزارت داخلہ کے عہدیداران بھی موجود تھے۔
