لندن : معرکہ حق میں بھارتی فضائیہ کو سبق سکھانے والے پاکستانی جے ایف 17 طیارے نے ایک اور اعزاز حاصل کرلیا۔
پاک فضائیہ کے طیاروں نے رائل انٹرنیشنل ایئر ٹیٹو شو میں عالمی اعزازات جیت لیے۔ برطانیہ میں ہونے والے ایئر شو میں معرکہ حق میں حصہ لینے والے JFـ17C بلاک III طیارے کو Spirit of the Meet ٹرافی سے نوازا گیا ہے۔
جے ایف 17 تھنڈر نے پاکستان سے برطانیہ تک مسلسل، نان اسٹاپ ایئر ٹو ایئر ریفیولنگ کے ذریعے سفر کیا۔اس کے علاوہ پاک فضائیہ کے سی 130 نے بھی پہلی پوزیشن حاصل کی۔ پاک فضائیہ کے طیارے سی 130 کو Concours d’Elegance Trophy سے نوازا گیا۔ پاک فضائیہ کے طیاروں کو یہ ایوارڈز طیاروں کی شاندار پرواز اور تکنیکی مہارت کے اعتراف میں دیے گئے۔
یاد رہے کہ پاکستانی فضائیہ کے دستے میں جدید ترین جے ایفـ17 تھنڈر بلاکـIII لڑاکا طیارہ اور سیـ130 ہرکیولیس ٹرانسپورٹ طیارہ شامل تھا۔یہ طیارے دو روز قبل رائل انٹرنیشنل ایئر ٹیٹو 2025ء میں شرکت کیلیے برطانیہ کی رائل ایئر فورس کے فیئر فورڈ اڈے پر پہنچے تھے۔دنیا کے سب سے بڑے فوجی ایئر شوز میں سے ایک رائل انٹرنیشنل ایئر ٹیٹو میں پاکستانی فضائیہ کی شرکت اس کی پیشہ وارانہ مہارت، آپریشنل صلاحیت اور اس کی ہوا بازی کی صنعت کی طاقت کو دکھانے کے عزم کو واضح کرتی ہے۔
پاکستانی جے ایف 17 کو برطانوی ایئر شو میں عالمی اعزاز مل گیا
